हाम्स ग्रुपद्वारा नेपालमा ‘क्यूजे मोटर’ का नयाँ मोडल सार्वजनिक

काठमाडौँ—नेपालको प्रतिष्ठित व्यावसायिक घराना हाम्स ग्रुप अन्तर्गतको हाइली एडभान्स मोटर्सले विश्व प्रसिद्ध ब्रान्ड क्यूजे मोटरका मोटरसाइकल तथा स्कुटर नेपाली बजारमा भित्र्याएको छ ।

टेकूस्थित कम्पनीको नयाँ शोरुममा आयोजित विशेष कार्यक्रमका बिच नेपालका पूर्व राष्ट्रिय क्रिकेट कप्तान तथा ब्रान्ड एम्बेसिडर पारस खड्काले नयाँ मोडलहरूको अनावरण गरेका हुन् ।

सन् १९८५ मा स्थापित क्यूजे मोटर विश्वकै चर्चित जिली ग्रुप अन्तर्गतको ब्रान्ड हो । यसै कम्पनीले इटालियन ब्रान्ड बेनेलीको स्वामित्व लिनुका साथै हार्ले–डेभिडसनका लागिसमेत बाइक निर्माण गर्दै आएको छ ।

चीनमा २५० सीसीभन्दा माथिका प्रिमियम बाइक सेग्मेन्टमा लगातार ११ वर्षसम्म शीर्ष स्थानमा रहेको यस ब्रान्डले मोटोजीपी र वल्र्ड सुपरबाइक च्याम्पियनसिप जस्ता विश्वस्तरीय रेसिङ प्रतियोगिताहरूमा पनि बलियो पकड बनाएको छ ।

कम्पनीले प्रारम्भिक चरणमा नेपाली ग्राहकका लागि चार वटा उत्कृष्ट मोडलहरू सार्वजनिक गरेको छ । जसअन्तर्गत २४९ सीसी शक्तिशाली इन्जिन र डुअल डिस्क ब्रेकसहितको एसआरभी २५०ए को मूल्य ९ लाख ७९ हजार रुपैयाँ तोकिएको छ ।

त्यसैगरी १७५ सीसी इन्जिन र एबीएस सुरक्षा फिचर रहेको एसआरके १८०एस को मूल्य ४ लाख ९९ हजार ९०० रुपैयाँ रहेको छ । १२५ सीसी लिक्विड–कुल्ड इन्जिन र आधुनिक टीएफटी डिस्प्ले युक्त एसआरके १२५एस को मूल्य ३ लाख ९९ हजार ९०० रुपैयाँ कायम गरिएको छ ।

एन्टी–थेफ्ट सिस्टम र कि–लेस इग्निसन जस्ता अत्याधुनिक सुविधा भएको आरकेओ १२५पी को मूल्य ३ लाख २९ हजार ९०० रुपैयाँ तोकिएको छ । यी मूल्यहरू नेपालमा ब्रान्डको प्रारम्भिक शुभारम्भ तथा दसैँ पर्वको अवसरमा दिइएको विशेष छुट अन्तर्गतका हुन् ।

दसैँ तथा ब्रान्ड लन्चको अवसर पारेर कम्पनीले नगद छुट र उपहारको विशेष प्याकेजसमेत घोषणा गरेको छ । अफर अन्तर्गत छनोट गरिएका मोडलहरूमा २० हजार रुपैयाँसम्मको नगद छुट पाइनेछ ।

साथै ५ जना ग्राहकले १० हजार रुपैयाँसम्मको स्मार्टवाच प्राप्त गर्नेछन् भने ३ जना भाग्यशाली विजेताहरूलाई १ लाख रुपैयाँसम्मको शैक्षिक छात्रवृत्ति प्रदान गरिनेछ ।

स्वास्थ्य, शिक्षा, व्यापार र कृषि क्षेत्रमा स्थापित हाम्स ग्रुपले अटोमोटिभ क्षेत्रमा व्यावसायिक गाडीहरूको सफलतापछि अब दुई पाङ्ग्रे बजारमा प्रवेश गरेको हो । नेपाली ग्राहकलाई अन्तर्राष्ट्रिय स्तरको प्रविधि, विश्वस्तरीय बनावट र उत्कृष्ट बिक्रीपछिको सेवा प्रदान गर्न कम्पनी पूर्ण रूपमा प्रतिबद्ध रहेको ग्रुपका प्रतिनिधिले जानकारी दिएका छन् ।