ग्रेटवाल मोटर्सले छुट्टै लक्जरी ब्रान्ड ‘कन्फिडेन्स अटो’ ल्याउने, सुरुवाती मूल्य नै १ लाख ४० हजार डलर

काठमाडौं– चिनियाँ अटो निर्माता ग्रेटवाल मोटर्स(जीडब्लुएम) ले लक्जरी सेग्मेन्टमा छुट्टै ब्रान्ड लन्च गर्ने भएको छ । जीडब्लुएमले ‘कन्फिडेन्स अटो’ ब्रान्डमा प्रिमियम कार उत्पादन गर्न लागेको हो । जसका लागि कम्पनीले सन् २०२२ मै ब्रान्ड दर्ता समेत गरिसकेको थियो ।

जीडब्लुएमले ल्याउने सो नयाँ लक्जरी ब्रान्डले मुलतः बीवाईडी याङवाङसंग प्रतिस्पर्धा गर्ने जनाइएको छ । सो नयाँ ब्रान्डले उत्पादन गर्ने कारको शुरुवाती मुल्य नै १ लाख ४० हजार डलर हाराहारी पर्ने अनुमान गरिएको छ ।

कन्फिडेन्स अटो नाममा कम्पनीले हाईब्रिड र इलेक्ट्रिक दुबै मोडल उत्पादन गर्ने योजना बनाएको छ । जसअनुसार पहिलो मोडल यसै वर्षको मे महिनातिर लन्च हुने आँकलन गरिएको छ । यस नयाँ ब्रान्डमा जीडब्लुएमले सुपर कार र सेडान भर्सन लन्च गर्न लागेको हो ।

त्यसो त जीडब्लुएमले अहिले पनि ‘हाई इन्ड’ ब्रान्डका रुपमा ट्यांक, वेई र सलुन अटोलाई बजारमा उतार्दै आएको छ । नयाँ ब्रान्ड ‘कन्फिडेन्स अटो’ यी तीनवटै ब्रान्डमाथी रहने उल्लेख गरिएको छ । कम्पनीले ओरा नाममा बिद्युतिय कार समेत उत्पादन गर्दै आएको छ । जुन नेपाली बजारमा समेत उपलब्ध छ ।