फेरारी भन्दा राम्रो सुपरकार निर्माण गर्दै ग्रेटवाल मोटर्स

चिनियाँ अटो निर्माता ग्रेटवाल मोटर्सले नयाँ सुपरकार विकास गर्ने योजना घोषणा गरेको छ । सो नयाँ कार फेरारी एसएफ९० भन्दा राम्रो हुने र आईसीई इन्जिनमा मात्र उपलब्ध हुने जनाइएको छ ।

नयाँ सुपरकारको योजना ग्रेटवाल मोटर्सका प्रमुख प्रविधि अधिकारी वु हुइक्सियाओले चिनियाँ सामाजिक सञ्जाल प्लेटफर्म वेइबोमा एक अन्तर्वार्तामार्फत खुलासा गरेकी हुन् । उनका अनुसार, नयाँ कार लन्च भएपछि, यो एक आश्चर्यजनक उत्पादन हुनेछ ।

‘हामीले एउटा कार निर्माण गर्नुपर्छ जसले एड्रेनालाईनलाई बढाउँछ र हर्मोन र डोपामाइनको विस्फोट गराउँछ,’ उनले भनिन् । सो नयाँ सुपरकार फेरारीसंग हाल उपलब्ध रहेको ९८५ बीएचपी ट्विन–टर्बो प्लग–इन हाइब्रिड एसएफ९० भन्दा राम्रो हुनेछ ।

नयाँ सुपरकारको इन्जिनको बारेमा कुनै जानकारी सार्बजनिक नगरिएपनि यसमा ४.० लिटर ट्विन–टर्बो भी८ प्रयोग हुनसक्ने अनुमान गरिएको छ । नयाँ सुपरकार विकास गर्नका लागि कम्पनीले अटोमोबाइल विज्ञहरुलाई चीनमा आमन्त्रित गरेको र कार्बन फाइबर पनि विकास गरिरहेको उल्लेख गरिएको छ ।