नेपाली बजारमा ग्रेटवाल ह्यावल जोलियन कार छिट्टै उपलब्ध हुने

ग्रेटवाल ह्यावल जोलियन कार नेपाली बजारमा उपलब्ध हुने भएको छ । चीनको प्रसिद्ध कम्पनी ग्रेटवाल मोटर्सको नेपालका लागि आधिकारिक विक्रेता भीजी इम्पेक्स बनिसकेको छ । यो गाडी छिट्टै नै नेपाली बजारमा उपलब्ध हुने सामाजिक सञ्जालमार्फत जानकारी दिइएको छ ।

सो पेजमा गाडीको वारेमा आधिकारिक जानकारी नदिइए तापनि यसको वेबसाइटमा भएको विवरण अनुसार यो १४९७ सीसी इन्जिनयुक्त गाडी हो । यसमा भएको टर्बोचार्जिङ टेक्नोलोजीले ११० किलोवाट सम्मको पावर र २२० एनएम टर्क जेनेरेट गर्छ ।

यसमा आवश्यकता अनुसार स्ट्यान्डर्ड, स्पोर्ट, इकोनोमी र स्नो ड्राइभिङ मोडको प्रयोग गर्न सकिन्छ । यसमा भएको हलुका मेकानिकल बनावट, इन्धन किफायतीपना, मल्टी ह्विल च्यासिस ट्युनिङ आदिका कारण ड्राइभिङ सहज हुने बताइएको छ ।

यसको वाहिरी भाग निकै आकर्षक छ । यसको स्मार्ट र सार्प फ्रन्ट फेस, क्लासिक फेमिली क्रोम प्लेटेड हनिकम्ब ग्रिल र थप फेसनेबल ट्रेन्डले वाहिरी आकर्षण बढाएको मान्न सकिन्छ ।

गाडीमा ठूलो प्यानोरामिक सनरुफ, एलईडी हेडल्याम्प र १८ इन्चको आल्मुनियम अलोय ह्विल छ ।

गाडीमा १२.३ इन्चको स्मार्ट टचस्क्रिन, ७ इन्चको कलर कम्बिनेसन भर्चुअल इन्स्ट्रयुमेन्ट, वायरलेस चार्जिङ र एप्पल कारप्ले तथा एन्ड्रोइड अटो जस्ता फिचर उपलब्ध छन् ।

बलियो बडी रहेको सो गाडीमा ६ एयरब्याग र अन्य विभिन्न सेफ्टी फिचर समेत उपलब्ध छन् ।