ग्वार्को फ्लाइओभर बनाउने निर्माण कम्पनी नै घाटामा, काम अझै नसकिदा म्याद थप्ने तयारी

काठमाडौं - ठेकेदार कम्पनी आषिश–समानान्तर–रेलिगेर जेभी काठमाडौंलाई ग्वार्को फ्लाइओभर निर्माण गर्दा ठूलो घाटा लागेको पाइएको छ । फ्लाइओभर बनाउँदा निर्माण कम्पनीले ठेक्का पाएको रकम भन्दा बढी खर्च भएपछि घाटा भएको देखिएको हो ।

फ्लाइओभर बनाउँदा ठेक्का सम्झौता भन्दा डबल खर्च भएको उक्त निर्माण कम्पनीका परियोजना प्रबन्धक कृष्ण गोपाल श्रेष्ठले जानकारी दिए ।

‘नेपालको यो पहिलो आयोजना भएकाले हामीलाई यसको खर्चको अनुमान भएन, जिम्मा लिइसकेको भएकाले जनतालाई समस्या नहोस् भनेर आफैले खर्च थपेर निमार्ण पूरा गर्नमा लाग्दै छौं,’ उनले भने । सडक विभागअन्तर्गतको गुणस्तर अनुसन्धान तथा विकास केन्द्रले उक्त कम्पनीलाई २०७८ फागुन १२ गते १७ करोड ६ लाख ८८ हजार रुपैयाँमा फ्लाइओभर बनाउने जिम्मा दिएको थियो ।

यद्यपि उक्त फ्लाइओभर बनाउँदा अहिलेसम्म करिव ४४ करोड खर्च भइसकेको श्रेष्ठले बताए । सम्झौतामा नभए पनि काम गर्दै जाँदा थपिका कामले समय र खर्च बढेको श्रेष्ठको भनाई छ ।

श्रेष्ठका अनुसार तीनवटै निर्माण कम्पनीले १५÷१५ करोड रुपैयाँ निर्माणका लागि थप लगानी गर्नुपर्ने भएको छ । परियोजनाको सुरुमै समय र खर्चको सहि अनुमान नहुँदा निमार्ण कम्पनीले घाटा बेहोरिरहेको श्रेष्ठले उल्लेख गरे ।

गुणस्तर अनुसन्धान तथा विकास केन्द्रले उक्त कम्पनीलाई २ वर्षको म्याद राखी २०८० फागुन ११ गतेसम्म निमार्ण कार्यसक्ने गरी जिम्मा दिएको थियो । तर, फ्लाइओभरको नक्सा परिवर्तन गरी निर्माणको कार्य सुरु गर्न ढिलाइ हुँदा सम्पन्न गर्न सकस परेको थियो ।

उक्त विषयलाई मध्यनजर गरी म्याद थप गरेर २०८१ पुस ८ गतेसम्म आयोजनाको काम सक्ने लक्ष्य राख्यो । तर, आयोजना निर्माणको समयअवधि सकिएता पनि फ्लाइओभर भने काम अझै सकिएको छैन । म्याद थपिएको अवधिमा पनि फ्लाइओभर काम नसकिएपछि निर्माण कम्पनी अहिले पुनः म्याद थपको लागि सडक विभाग धाइरहेको छ ।

कम्पनीले फेरि म्याद थप्ने प्रस्ताव गर्दा सडक विभागले नस्विकारेको श्रेष्ठले जानकारी दिए । फ्लाइओभरको निर्माण कार्य अझै नसकिएकाले निर्माण कम्पनीले अब दैनिक ८८ हजार रुपैयाँ हर्जना तिर्नुपर्ने सडक विभागले बताएको छ ।

कहिले सकिन्छ काम ?

फ्लाइओभरको काम सक्ने विषय अझै अन्योलमा छ । निर्माण कम्पनी वा गुणस्तर अनुसन्धान तथा विकास केन्द्रका पदाधिकारीले १/२ महिनाभित्रै काम सकिएर सञ्चालनमा आउँछ भनेता पनि उक्त आयोजनाको काम सक्न अझै समय लाग्ने भएको हो ।

अहिलेसम्म करिव फ्लाइओभरको ९० प्रतिशत निमार्ण कार्य पूरा भइसकेको श्रेष्ठले जानकारी दिए । उनका अनुसार कालोपत्रे साथै ट्राफिक लाइट जडान लगायतका काम भने बाँकी छन् । कोटेश्वरतर्फ निमार्ण लगभग सकिए पनि सातदोबाटोतर्फ भने काम बाँकी भएको श्रेष्ठको भनाई छ ।

‘कालोपत्रे र ट्राफिक लाइट लगायतको काम बाँकी छ, यो सबै सकेर फ्लाइओभर सञ्चालनमा ल्याउन अझै ३/४ महिना लाग्छ,’ उनले भने । कम्पनीले पेस गरेको फ्लाइओभरको डिजाइनलाई स्वीकृत गर्न समय लागेको भएकाले अवरोध आएको श्रेष्ठको बुझाई छ ।