नेपाल भित्रियो गोल्डन ड्रागनको नयाँ इलेक्ट्रिक भ्यान, मूूल्य ५७ लाख

काठमाडौं – नेपाली बजारमा चीनमा निर्मित नयाँ इलेक्ट्रिक माइक्रोबस अर्थात ईभी भ्यान भित्रिएको छ । आर्क्स ग्रुुपले पहिले भित्र्याउने भनेर चर्चा भएको ईभी भ्यान अब गोल्डन ड्रागन ब्रान्डमा उपलब्ध हुने भएको हो ।

सो गाडी नेपाल भित्रिसकेको र भन्सार प्रयोजनका लागि मूूल्य समेत सार्वजनिक गरेको कम्पनीको भनाइ छ । यसको मूल्य ५७ लाख रुपैयाँ तोकिएको छ । केही दिनमै औपचारिक रुपमा सो गाडी लन्च गरिने छ ।

सो ईभी भ्यानमा ५०.२३ किलोवाट आवरको सीएटीएल ब्याट्री छ । यसले सिंगल चार्जमा एनईडीसी अनुसार ३०० किलोमिटर रेन्ज दिने कम्पनीको दावी छ । यसमा भएको रिजेन स्विचको प्रयोग गरेर राम्रो माइलेज प्राप्त गर्न सकिन्छ ।

१४ जना यात्रु बस्न मिल्ने सो गाडीको ग्राउन्ड क्लियरेन्स १९० एमएम छ । यसकारण पहाडी सडकमा समेत सहज तरिकाले यात्रा गर्न सकिन्छ । यसमा भएको अलोय ह्विलले यसको पर्फमेन्स र लुकलाई राम्रो बनाएको बताइएको छ ।

गाडीमा सुरक्षाका लागि रियर भ्यु क्यामेरा छ भने गाडीको गतिविधि निगरानी गर्नका लागि एलईडी डिजिटल ड्यासबोर्ड छ ।

विश्वका विभिन्न १२० देशमा निर्यात गर्ने गोल्डन ड्रागनको सो गाडी नेपाली बजारमा आर्क्स ग्रुुपले भित्र्याएको हो । सहज तरिकाले चार्जिङ गर्नका लागि देशका मुुख्य सहरमा चार्जिङ स्टेसन राख्ने कम्पनीको भनाइ छ ।

यसमा ५ वर्ष वा २ लाख किलोमिटर गुड्दा सम्मको वारेन्टी समेत उपलब्ध हुनेछ । त्यसैगरी सवारी साधन किन्न चाहनेका लागि सहज फाइनान्स सुविधा समेत उपलब्ध हुने बताइएको छ ।