ग्लोवल आइएमईले १०.९९ र १०.४९ प्रतिशत फिक्स्ड रेटमा अटो कर्जा दिने

काठमाडौं– ग्लोवल आईएमई बैंकले अटो लोन अफर ल्याएको छ । सो अफर अन्तर्गत फ्यूल इन्जिन र इलेक्ट्रिक कारमा फरक–फरक ब्याजदर निर्धारण गरिएको छ । फ्यूल इन्जिन गाडीको खरिदमा १०.९९ प्रतिशत र इलेक्ट्रिकमा १०.४९ प्रतिशत फिक्स्ड ब्याजदर निर्धारण गरिएको बैंक स्रोतले जनाएको छ ।

बैंकको देशभर सञ्चालनमा रहेका शाखाबाट ग्राहकले अटोलोन सुविधा पाउनेछन् । ग्राहकले अप्लाई गरेको तीनदिन भित्र लोनको प्रक्रिया टुंगिने बैंकको भनाई छ । बैंक तथा वित्तिय संस्थामा तरलता बृद्धि भएसंगै पछिल्लो समय बाणिज्य बैंकहरुले अटो लोनमा खुकुलो निती लिन थालेका छन् । साथै ब्याजदर समेत क्रमिक रुपमा घट्न थालेको छ ।

बैंकहरुले फ्यूल इन्जिन गाडीमा बढीमा ५० प्रतिशतसम्म र इलेक्ट्रिकमा ८० प्रतिशतसम्म लोन दिन सक्नेछन् । यसरी लिएको कर्जालाई ग्राहकले बढीमा ७ वर्षभित्र चुक्ता हुनेगरी मासिक किस्ताका रुपमा भुक्तानी गर्नुपर्ने हुन्छ ।