नासा नेपालको उपाध्यक्षमा गजुरेल र शाह चयन

काठमाडौं – नेपाल अटोमोबाइल्स एसोसिएसन (नासा नेपाल) को केन्द्रीय कार्यसमितिको तेस्रो बैठक सम्पन्न भएको छ । संघका अध्यक्ष दशरथ रिसालको अध्यक्षतामा सम्पन्न भएको बैठकले वार्षिक तथा आवधिक कार्ययोजना पारित गरेको छ ।

बैठकले रिक्त उपाध्यक्ष पदमा आशिष गजुरेल तथा सम्झना शाह पोखरेललाई चयन गरेको छ भने २३ विभिन्न विषयगत कमिसन, कार्यदल र जिम्मेवारी तोकेको छ । संघको विधानमा व्यवस्था भए बमोजिम संघमा तीन टायर (सल्लाहकार, कार्यसमिति तथा सचिवालय) को व्यवस्था गरिएको छ ।

यस अनुसार संघको सल्लाहकारहरुमा धनञ्जय रेग्मी, डा. शिवजी यादव, शिवहरी सापकोटा, शिवप्रसाद घिमिरे, ठाकुरप्रसाद न्यौपाने, अच्युत गुरागाई, डिल्लीराज सुवेदी, ऋतु भट्ट, चंकी क्षेत्री र अनिल भण्डारीलाई चयन गरेको छ । साथै गोविन्द भट्टराई, सन्तोष न्यौपाने, महेश अधिकारी, कमला छेत्री, यदुराज लामिछाने, स्पोर्ट्स म्यानेजर तथा नासा फाउन्डेसनका प्रतिनिधि रहेको सात सदसिय सचिवालय समेत अनुमोदन गरेको छ ।

बैठकले साधारण सभाको निर्णय अनुसार आर्थिक नियमावली, इभेन्ट व्यवस्थापन नियमावली तथा प्रदेश संघ, क्लब तथा सचिवालय सञ्चालन नियमावली पारित गरेको छ भने -यालीक्रस, अटोक्रस तथा गियर एन्ड ग्याजेट सम्बन्धी प्राविधिक मापदण्ड समेत तयार गरेको छ ।

देशका सातवटै प्रदेशमा रहेका प्रदेश संघको साधारणसभा तथा निर्वाचन यथासक्य छिटोे अगाडि बढाउने निर्णय गरेको छ भने एसोसिएट र क्लबलाई समेत सक्रिय रुपमा परिचालन गर्ने निर्णय भएको छ ।

संघको मोबिलिटी र सडक सुरक्षा सम्बन्धी एसोसिएट पार्टनर नासा फाउन्डेसन नेपाललाई सो सम्बन्धी सम्पूर्ण कार्यको अख्तियारी दिइएको नासा नेपालले जनाएको छ ।

त्यस्तै आगामी अप्रिल २० देखि २२ मा ताइवानमा हुने ताइपेई इन्टरनेसनल अटो जिमखाना प्राइजमा खेलाडी सहभागी गराउने निर्णय गरेको छ । बैठकले -यालीक्रसका मार्सल तथा ड्राइभरलाई तालिम दिने, इमर्जिङ लिडरशिप प्रोग्राम तथा एथलेट अवार्ड प्रोग्राम समेत निकट भविष्यमा सञ्चालन गर्ने निर्णय गरेको बताएको छ ।