लामो समय टिकेन जिएसी र स्टेलान्टिसको साझेदारी, वित्तिय रुपमा टाट पल्टिएको घोषणा

काठमाडौं–विश्वका दुई ठूलो अटो निर्माता जिएसी र स्टेलान्टिसको साझेदारी वित्तिय रुपमा टाट पल्टिएको घोषणासंगै टुंगिएको छ । चीनको जिएसी र युरोपेली जायन्ट स्टेलान्टिसले सन् २०१० मा १७ अर्व युआन लगानीमा ५०ः५० प्रतिशतको सेयर हिस्सासहित एकआपसमा साझेदारी गरेका थिए ।

यी दुई समुह मिलेर चीनमा पहिलोपटक फियाट ब्रान्डका कार निर्माण गरेका थिए । सन् २०१२ मा फियाट भियाग्गियो मोडल लन्च गरेको कम्पनिले सुरुवाती वर्षमा ९ हजार वढि कार बिक्री गरेको थियो ।

सन् २०१५ मा जिएसी–एफसिए(फियाट क्राइस्लर अटोमोबाईल) का नामले नयाँ ब्रान्डिङ गरेपछि कम्पनी जीपको उत्पादनमा केन्द्रित बन्यो । सोहि वर्ष जीपको चेरोकी एसयुभी लन्च गरेको यस साझेदारीले लगत्तै बजारमा राम्रो प्रतिक्रिया पायो । चेरोकी लन्च भएको १ वर्षमै १ लाख ४६ हजार ४०० युनिट बिक्री भयो पनि ।

सन् २०१७ मा २ लाख ५ हजार कार बिक्री गरेको यस कम्पनिले त्यसपछिका वर्षहरुमा भने नराम्रोसंग बजार गुमाउनु पर्यो । २०१८ मा १ लाख २५ हजार युनिटमा सिमित भएको यसको बिक्री २०२१ सम्म आईपुग्दा जम्मा २१ हजारमा सिमित भयो । बिक्रीमा सुधार ल्याउन ४ अर्व युआन थपिए पनि यसले खासै प्रभाव पारेन ।

त्यसपछि, एफिसिएले आफ्नो हिस्सा ७५ प्रतिशत हुनुपर्ने माग राखेपछि यी दुई कम्पनिविच असहमति बढ्दै गयो । गम्भिर असहमतिका माझ सन् २०२२ देखी बन्द अवस्थामा रहेको यसको उत्पादन प्रक्रिया हाल आएर टाटा पल्टिएको घोषणासंगै सधैँका लागि बन्द हुन पुगेको छ ।