बीवाईडी डल्फिन भन्दा सस्तो मुल्यमा आयो एवोनको नयाँ ईभी, यस्तो छ विशेषता

काठमाडौं– चिनियाँ ईभी निर्माता एवोनले नयाँ बिद्युतिय कार एवोन यूटीको प्री–सेल सुरु गरेको छ । कम्प्याक्ट डिजाइनमा तयार पारिएको यूटीले बीवाईडी डल्फिनसंग प्रतिस्पर्धा गर्ने जनाइएको छ । सो नयाँ कारको मुल्य चीनमा १२ हजार ३०० देखी १५ हजार डलरसम्म पर्ने बताइएको छ । जुन १३ हजार ६५० देखी १७ हजार ७५० डलरसम्म मुल्य निर्धारण गरिएको बीवाइडी डल्फिन भन्दा सस्तो हो ।

साइजका हिसावले डल्फिनभन्दा केही ठूलो एवोन यूटीमा १४.६ इन्चको टचस्क्रिन इन्फोटेन्मेन्ट सिस्टम तथा ८.८ इन्चको इन्स्ट्रयुमेन्ट क्लस्टर उपलब्ध छ । कारको इन्फोटेन्मेन्ट सिस्टमले हाई कार, कार लिंक र कारप्ले जस्ता एप सपोर्ट गर्दछ ।

आर्टिफिसियल भ्वाइस एसिस्टेन्ट फिचर समेत उपलब्ध यस कारमा चालकले भ्वाइस कमान्ड मार्फत नै नेभिगेसन, सिट र क्लाइमेट कन्ट्रोल गर्न सक्छन् । कारको पछाडी वस्ने यात्रुलाई सहज होस भनेर दुबै सिटमा हेड रेष्ट समेत राखिएको छ ।

एवोन यूटीमा ४४ किलोवाट आवरको एलएफपी ब्याट्री तथा १०० किलोवाट क्षमताको मोटर जडान गरिएको छ । ब्याट्रीलाई एकपटक फुल चार्ज गर्दा ४२० किलोमिटर रेन्ज दिने यस कारलाई डिसी फास्ट चार्जरको साहयताले २४ मिनेटमै ३० देखी ८० प्रतिशतसम्म चार्ज गर्न सकिन्छ । कारलाई १५० किलोमिटर प्रतिघण्टाको उच्च गतिमा हाँक्न सकिन्छ ।