आज पनि पूर्ण रुपमा अवरुद्ध छन् यी सडक

काठमाडौं - अविरल वर्षा र पहिरोका कारण देशका तीन प्रदेशमा पर्ने ७ वटा मुख्य राजमार्ग पूर्ण रूपमा अवरुद्ध भएका छन्। नेपाल प्रहरीले आज जारी गरेको सूचना अनुसार, कोशी र बागमती प्रदेशका जिल्लाहरूमा यातायात बढी प्रभावित बनेको छ।

कोशी प्रदेशमा अवस्था जटिल

कोशी प्रदेशमा सङ्खुवासभा र इलाम जिल्लामा मुख्य राजमार्ग पूर्ण रूपमा अवरुद्ध भएका छन्। कोशी राजमार्ग अन्तर्गत सङ्खुवासभाको मोठखोला गाउँपालिकाको बर्षेखोला क्षेत्रमा अविरल वर्षाका कारण पूर्ण अवरोध छ।

मेची राजमार्ग इलामका विभिन्न स्थानमा अविरल वर्षाले गर्दा पूर्ण रूपमा अवरुद्ध भएको छ। धनकुटामा मध्य पहाडी लोकमार्ग पाख्रीबास नपा-५ दिक्तेलमा एकतर्फी रूपमा सञ्चालनमा छ।

बागमती प्रदेशका तीन राजमार्गहरू पूर्ण रूपमा अवरुद्ध

रसुवाको गोसाइकुण्ड गाउँपालिकाको टिमुरे नजिक पहिरोका कारण सडक पूर्ण रूपमा अवरुद्ध भएको छ।

बी.पी. राजमार्ग काभ्रेपलाञ्चोकको कोशी रोशी गाउँपालिकामा पहिरोले गर्दा पूर्ण अवरोध रहेको छ। यसैगरी सिन्धुलीको सुनकोशी गाउँपालिका-१ नेपालथोक क्षेत्रमा पहिरोका कारण बी.पी. राजमार्ग पूर्ण रूपमा अवरुद्ध भएको छ।

मकवानपुरमा कान्ति लोकपथ सडक र सिन्धुलीमा मदन भण्डारी राजमार्ग केही स्थानमा पहिरो र वर्षाका कारण एकतर्फी रूपमा मात्र सञ्चालनमा रहेका छन्।

कर्णाली करिडोर पनि अवरुद्ध

कर्णाली प्रदेशअन्तर्गत हुम्ला जिल्लामा पनि पहिरोका कारण कर्णाली करिडोर पूर्ण रूपमा अवरुद्ध भएको छ।

यातायात सुचारु गर्नका लागि प्रहरी टोली र सडक विभागका कर्मचारीहरू खटिएका छन्। अत्यावश्यक काम बाहेक यात्रामा ननिस्कन र सडकको अवस्थाबारे जानकारी लिएर मात्र यात्रा गर्न प्रहरीले सम्पूर्ण यात्रुहरूलाई अनुरोध गरेको छ।