फोर्ड भारतमा पुनरागमन गर्ने, चेन्नई प्लान्टमा ३ हजार २५० करोड लगानी गर्ने

फोर्डले २०२१ मा भारतमा आफ्नो कारोबार स्थगित गरेपछि अब पुनः भारतीय बजारतर्फ फर्कने तयारी गरेको छ। कम्पनीले तमिलनाडुको चेन्नई स्थित मरैमलाई नगरमा रहेको आफ्नो पुरानो कारखाना पुनः सञ्चालनमा ल्याउने निर्णय गरेको हो।

यसको लागि फोर्ड कम्पनीले करिब ३ हजार २५० करोड भारु बराबरको लगानी गर्ने भएको छ । साथै कम्पनीले २०२९ देखि आफ्नो उत्पादन सुरु गर्ने लक्ष्य राखेको छ, जसअन्तर्गत प्रारम्भिक चरणमा वार्षिक २ लाख ३५ हजार इन्जिन उत्पादन गरिने योजना छ।

फोर्ड भारतमा सक्रिय हुँदा यसको दुई प्रमुख उत्पादन केन्द्रहरू थिए । एउटा चेन्नईमा र अर्को गुजरातको सानन्दमा । तर, विश्वव्यापी रूपमा बढी नाफामुखी बजारमा ध्यान केन्द्रित गर्ने उद्देश्यले कम्पनीले २०२१ मा भारतबाट बाहिरिने निर्णय लिएको थियो । त्यसपछि टाटा मोटर्सले सानन्द प्लान्ट अधिग्रहण गर्यो भने फोर्डले चेन्नई प्लान्टलाई आफ्नो स्वामित्वमा राख्यो । तर यो प्लान्ट २०२२ पछि बन्द अवस्थामा थियो।

२०२४ मा फोर्डले चेन्नई प्लान्ट पुनः सुरु गर्ने प्रस्ताव तमिलनाडु सरकारसमक्ष पेश गरेको थियो। अमेरिकाले २५ देखि ५० प्रतिशतसम्मको भारी आयात शुल्क कायम राखेकाले फोर्डले आफ्नो व्यापार रणनीतिमा परिवर्तन गर्नुपरेको विश्लेषकहरू बताउँछन् । अब कम्पनीले अमेरिकी बजारभन्दा युरोप तथा अन्य देशहरूलाई लक्षित गर्दै नयाँ योजना अघि बढाएको देखिन्छ।

चेन्नई प्लान्ट पुनः सञ्चालन भएसँगै यसले फोर्डको नयाँ पुस्ताका इन्जिनहरू उत्पादन गर्नेछ । यहाँ आवश्यक स्तरमा पूर्वाधार स्तरोन्नति गर्ने काम यसै वर्षदेखि सुरु गरिने भएको छ। प्लान्ट पुनः सञ्चालनमा आएपछि करिब ६०० नयाँ रोजगारी अवसर समेत सिर्जना हुने अपेक्षा गरिएको छ। हालका लागि फोर्डको ध्यान केवल इन्जिन निर्यातमा रहनेछ।