फोर्डले अब भारतमा इलेक्ट्रिक कार उत्पादन गर्ने

६ महिनाअघि भारतमा रहेको आफ्नो उत्पादन युनिट बन्द गर्ने निर्णय लिएको फोर्डले उक्त निर्णयलाई पुनर्बिचार गर्ने भएको छ । भारतको केन्द्रिय सरकारले इलेक्ट्रिक र हाइड्रोजन सेल कार उत्पादनलाई बढाउन दिने गरि उपलब्ध गराउन लागेको ठूलो रकम सुबिधा हात पार्न आफूले पेश गरेको प्रस्ताब स्विकार भएपछि फोर्डले यस्तो निर्णय लिएको हो ।

‘प्रोडक्सन लिंक्ड इन्सेन्टिभ’ नाम दिइएको उक्त प्याकेज अन्तर्गत यस्ता कम्पनीले २६ हजार करोड भारु नगद सुबिधा पाउनेछन् । जुन बिभिन्न इभी उत्पादक देखी स्पेयर पार्टस उत्पादन गर्ने कम्पनीलाई समेत उपलब्ध गराइने भएको छ ।

सुबिधामा पाइने रकमलाई फोर्ड मोटर्सले इलेक्ट्रिक कार उत्पादनमा लगानी गर्ने विषयमा छलफल अघि बढाएको छ । जस अन्तर्गत हाल संचालनमा रहेको दुई प्लान्टमध्ये एकलाई बिक्री गर्ने र अर्कोमा इभी उत्पादन गर्न सक्ने संभावना देखएको हो । यी दुबै प्लान्टमा कम्वस्टन इन्जिनयुक्त फोर्ड कार उत्पादन हुँदै आएका कारण इभी उत्पादनका लागी उसले नयाँ उपकरण र प्रबिधी थप गर्नुपर्नेछ । जसका लागी ठूलो रकम खर्च हुनेछ ।

इभी उत्पादनमा आक्रमक लगानी बिस्तार गर्ने घोषणा गरेको फोर्ड मोटर्सले निर्यातमा केन्द्रित भई इभीको उत्पादन थाल्ने देखिएको छ । साथै उसले भारतीय उपभोक्ताका लागि कम मूल्य पर्ने बजेट इभी समेत उत्पादन गर्ने र अन्य मुलुकमा उत्पादन गरिएको प्रिमियम मोडलका कम्वस्टन इन्जिनयुक्त कारको आयतलाई निरन्तरता दिने संभावना देखिएको छ ।

फोर्डले इलेक्ट्रिक कारको उत्पादन र बिकासका लागी सन् २०३० सम्ममा कुल ३० अर्ब डलर लगानी गर्ने बताइसकेको छ ।
अमेरिकन अटो निर्माता फोर्डले भारतस्थित प्लान्टबाट आफूले ठूलो रकम नोक्सानी बेहोर्नुपरेको भन्दै अघिल्लो बर्षको सेप्टेम्बर महिनामा उत्पादन युनिट बन्द गर्ने घोषणा गरेको थियो । उक्त घोषणाले अटोमोबाइलको उत्पादन हब बनाउने भारत सरकारको योजनामाथी नै असर गर्ने भन्दै जसरी हुन्छ फोर्डलाई भारतमा रहिरहने बाताबरण बनाइनु पर्ने विषयलाई लिएर सरकारमाथी दबाब सिर्जना भएको थियो ।