दुबई एयर शोमा उड्ने ट्याक्सी प्रदर्शन हुने, १,५०० कम्पनी सहभागी हुने

दुबईले आगामी नोभेम्बर १७ देखि २१ सम्म दुबई एयर शो २०२५ आयोजना गर्ने भएको छ । दुबई वर्ल्ड सेन्ट्रलमा आयोजना हुने यस प्रदर्शनीमा एक विशेष भर्टिपोर्ट लाउन्ज हुनेछ, जहाँ आगन्तुकले भविष्यको यात्राको प्रत्यक्ष अनुभव पाउनेछन्।

भर्टिपोर्ट भनेको त्यस्तो स्थान हो जहाँ उड्ने ट्याक्सीले उडान भर्ने र अवतरण गर्ने सुविधा पाउँछन् । यहाँ एयर ट्याक्सी सेवा पनि प्रदान गरिन्छ। यसै वर्ष दुबईले देशकै पहिलो व्यावसायिक भर्टिपोर्टको घोषणा गरेको थियो, जसलाई दुबई इन्टरनेसनल भर्टिपोर्ट नाम दिइएको थियो । आगामी वर्षदेखि यस भर्टिपोर्टमार्फत व्यावसायिक एयर ट्याक्सी सेवा सुरु हुने अपेक्षा गरिएको छ।

दुबई एयर शो २०२५ मा विश्वभरका १,५०० भन्दा बढी कम्पनी सहभागी हुनेछ भने २०० भन्दा बढी विमानहरू प्रदर्शित गरिनेछ। यस कार्यक्रमको मुख्य आकर्षण भनेको अर्को वर्षदेखि सुरु हुने इलेक्ट्रिक उड्ने ट्याक्सी सेवा हुनेछ। आयोजकले यो एयर शोले हवाई यातायातलाई नयाँ पहिचान दिने बताएका छन्।

भारतीय कम्पनी सरला एभिएसन र चिनियाँ कम्पनी ट्रान्सफ्युचर एभिएसनले पहिलो पटक दुबई एयर शोमा सहभागिता जनाउने भएका छन्। यसले उड्ने ट्याक्सी प्रविधिमा विश्वभर बढ्दो चासोलाई देखाएको छ। साथै, आर्चर एभिएसन, जोबी एभिएसन, अटोक्राफ्ट, एनान र वेफ्लाइ जस्ता कम्पनीले आफ्ना नयाँ विमान, बजार रणनीति र भविष्यका अवधारणाहरू प्रस्तुत गर्नेछन्।

दुबई एयर शो २०२५ लाई विश्व हवाई यात्रामा क्रान्तिकारी मोड ल्याउने अवसरका रूपमा हेरिएको छ, जहाँ उड्ने ट्याक्सीहरूले भविष्यको यातायात सिस्टमको प्रत्यक्ष झलक प्रस्तुत गर्नेछन्।