नाडा अटो शोमा दिपलको उड्ने कार र रोबोट अवलोकन गर्न पाइने

भदौ ३ गतेदेखी सुरु हुने नाडा अटो शोमा उड्ने कार र रोबोट देख्न पाइने भएको छ । नाडा अटोमोबाइल्स एसोसिएसन अफ नेपालको आयोजनामा हरेक वर्ष हुँदै आएको नाडा अटो शोमा यो वर्ष आधुनिक उपकरण देख्न पाइने भएको हो ।

नाडाले मंगलबार नाडा अटो शो २०२५ बारे जानकारी गराउन आयोजना गरिएको पत्रकार सम्मेलनमा उक्त जानकारी दिएको हो ।

दिपलको उड्ने कार ‘दिपल इभीटीओल युएभी’ र चिनियाँ कम्पनी हाङझाउ युशु टेक्नोलोजी कम्पनी लिमिटेडले उत्पादन गरेको युनिट्री रोबोट नाडामा प्रदर्शनीका लागि राखिने नाडाका अध्यक्ष करण चौधरीले जानकारी गराए ।

एमएडब्लु बृद्धि आधिकारिक वितरक रहेको युनिट्री ‘नाडा अटो शो २०२५’ को टाइटल स्पोन्सर समेत रहेको छ । हाङझाउ युशु टेक्नोलोजी कम्पनी लिमिटेडले युनिट्री रोबोटको ट्रेडमार्क बनाएर यही नाममा रोबोट म्यान र रोबोट डग उत्पादन गरिरहेको छ । नाडा अटो शोमा रोबोट म्यान तथा रोबोट डग दुवै प्रदर्शनीमा राखिने भएको छ ।