क्रेटालाई टक्कर दिन आउँदैछन् यी ५ नयाँ एसयुभी

बजारमा अहिले सबैभन्दा बढी माग भएको सेग्मेन्ट हो मिडसाइज एसयुभी । यो सेग्मेन्टमा अहिले हुन्डाई क्रेटा, किया सेल्टोस, स्कोडा कुसाक, फक्सवागन टाइगुन, महिन्द्रा एक्सयुभी ३००, निशान किक्स लगायत अन्य केही ब्रान्डका एसयुभीहरुको समेत कारोबार भैरहेको छ । जसमध्ये क्रेटाले सर्बाधिक लोकप्रियता कमाइरहेको छ ।

क्रेटालाई टक्कर दिन भारतमा बिभिन्न ५ ब्रान्डले यो सेग्मेन्टमा नयाँ एसयुभी ल्याउने तयारी थालेका छन् । जसमध्ये टाटाले नेक्सनमा आधारित कुपे स्टायलको ब्ल्याकबर्ड एसयुभी ल्याउन लागेको जनाइएको छ । यो एसयुभी हाल कारोबार भैरहेको नेक्सन र ह्यारियरको बिचमा रहनेछ । टाटा मोटर्सले यसलाई नेक्सनमा प्रयोग गरिएको एक्स १ प्लेटफर्ममा उत्पादन गर्ने जनाएको छ । जुन इलेक्ट्रिक र कम्वस्टन इन्जिन दुबै भर्सनमा उपलब्ध हुनेछ । कम्वस्टन इन्जिनमा यो १.५ लिटर टर्बो पेट्रोल र १.५ लिटरकै टर्बो डिजेलमा उपलब्ध हुन सक्ने अनुमान लगाइएको छ ।

त्यसैगरी मारुती सुजुकीले टोयोटासंगको सहकार्यमा उत्पादन गर्न गैरहेको अर्को नयाँ एसयुभीलाई कम्पनीले वाइएफजी कोडनेम दिएको छ । यो नयाँ एसयुभीले हाल कारोबार भैरहेको एस क्रस मोडललाई प्रतिस्थापन गर्ने बताइएको छ । टोयोटाको ‘डाइहत्सु न्यू ग्लोवल आर्किटेक्चर’मा आधारित भई उत्पादन हुने भनिएको यो एसयुभीलाई सुजीकीले १.५ लिटर हाइब्रिड पावरट्रेनमा ल्याउन सक्ने अनुमान लगाइएको छ ।

यो सेग्मेन्टमा टोयोटाले समेत नयाँ एसयुभीलाई बजारमा उतार्ने योजना वनाएको छ । जसको कोडनेम डी २२ दिइएको छ । हाल कारोबार भैरहेको रेज एसयुभीकै हाराहारीमा रहने अनुमान लगाइएको यो नयाँ एसयुभी समेत हाइब्रिड पावरटे«नका साथ आउन सक्ने अनुमान गरिएको छ ।

महिन्द्राले ७ सिटर एक्सयुभी ५०० लाई ५ सिटरमा उतारेर क्रेटासंग प्रतिस्पर्धा गर्ने योजना बनाएको छ । यो नयाँ एसयुभीलाई उसले एक्सयुभी ३०० को परिस्कृत प्लेटफर्ममा आधारित भई निर्माण गर्ने भएपनि नाम भने एक्सयुभी ५०० नै राख्न सक्ने अनुमान लगाइएको छ । यो नयाँ एसयुभी डिजेल र पेट्रोल दुबै इन्जिनमा उपलब्ध हुनेछ ।

फ्रेन्च अटो निर्माता रेनोले अघिल्लो बर्षदेखी बन्द गरेको रेनो डस्टरलाई नयाँ डिजाइनका साथ पुन बजारमा ल्याउने बताएको छ । यो नयाँ एसयुभी थर्ड जेनेरेशनको हुने र यसमा सिएमएफ–बी प्लेटफर्म प्रयोग हुने रेनोले जनाएको छ ।