यसरी भइरहेको छ सवारीसाधनको फिटनेस टेष्ट

काठमाडौं – सवारी साधनको फिटनेट परीक्षण गर्नका लागि काठमाडौंको टेकुस्थित भेइकल फिटनेस टेष्ट सेन्टर स्थापना भएको छ । तर कार्यविधि नबन्दा कुनै पनि सवारीलाई परीक्षण अनिवार्य भनेर तोकिएको छैन। त्यसैले ट्राफिक चेकिङमा परेका ८र १० वटा सवारी साधानहरु आउछन् त्यसैलाई मात्र चेक जाँच गरिएको भेइकल फिटनेस टेष्ट सेन्टर टेकुका प्रमुख मनिराम भुसाल बताउँछन्।

मेसिनले गर्ने टेष्ट समेत भइरहेको छैन। मौखिक रुपमा यसो हेरेको भरमा चेक जाँच गर्ने काम भइरहेको छ। हाल म्यान्युअल रुपमा टेष्ट भइरहेको भुसालको भनाइ छ। भुसालका अनुसार यसलाई हाम्रो अहिले रहेको पुरानो यातायात व्यवस्थापन निर्देशिकामा भएका केही सामान्य कुराहरुलाई आधार बनाएर चेक जाँच गरिएको छ। तर निजी सवारी साधनको अवस्था चेक जाँच गर्ने व्यवस्था अहिलेसम्म भएको छैन ।

यो उपकरण सञ्चालनमा आएपछि हेभी र लाइट दुबै खालका सवारी साधन आ-आफ्नो लेनमा एउटाबाट छिरेर अर्को दिशाबाट निस्कँदा कम्प्युटरमा नै कुन कुन भागको अवस्था कस्तो छ भनी जानकारी दिनेछ। सवारी साधन पास भए उसले प्रमाणपत्र पाउने र फेल भएमा पुनः मर्मत गरेर ल्याएर अवस्था ठीक भएपछि मात्रै प्रमाणपत्र पाउने व्यवस्था हुनेछ।

यो उपकरणबाट ब्रेक रोलर, सस्पेन्सन, साइट क्लिक, हर्न, लाइटलगायतका कुरा परीक्षण हुनेछ। अगाडि र पछाडिको पाङ्ग्रामा कति भार हुनुपर्ने, सवारीको क्षमतानुसार भार बोक्दा ब्रेकले काम गर्छ वा गर्दैन, प्राविधिक जाँच, सस्पेन्सन (पाङ्ग्राको साइड स्लिप), हर्नको अवस्था, हेडलाइटलगायत कुराको समेत यसमा परीक्षण हुनेछ।

त्यससँगै च्यासिस खिया वा कोतरिएको अवस्था बुझ्नका लागि भिजुअल इन्स्ट्रक्सन समेत हुने गरेको छ। हलुका सवारीलाई उचालेर माथिल्लो भागमा पुर्याएर र गह्रौँ सवारी साधन भइरहेकै स्थानमा तल्लो तलामा प्राविधिक गएर च्यासिसलगायतका भाग हेर्ने गरिन्छ।

भन्सारबाट आएका विद्युतीय गाडीहरु पहिले बाटोमा चलाउन मिल्ने भनी सेन्टरले प्रमाणित गरेपछि मात्रै यातायात व्यवस्था कार्यालयमा दर्ता हुने गर्छ।