आयोनिक ५ को पहिलो लट भयो पुरै बुक, नयाँ ग्राहकले कम्तीमा ३ महिना कुर्नुपर्ने

हुन्डाईले नेपाल ल्याएको नयाँ इलेक्ट्रिक कार आयोनिक ५ को पहिलो लट पुरै बुक भएको छ । नेपालका लागी आधिकारिक बितरक लक्ष्मी इन्टरकन्टिनेन्टलले हिजो इलेक्ट्रिक कारको बिशेष शोरुम सुचारुसंगै बिक्री थालेको आयोनियक ५ को केही युनिटमात्र शोरुममा राखेको छ । बाँकी युनिट भन्सारबाट आउँदै गरेको र बुकिङ लिएका ग्राहकलाई क्रमिक रुपमा हस्तान्तरण गरिँदै जाने कम्पनी स्रोतले बताएको छ ।

नेपाल आएको पहिलो लट पुरै बुक भैसकेको र बुकिङमा रुची राख्ने ग्राहक समेत बढिरहेका कारण नयाँ ग्राहकले कम्तीमा ३ महिनासम्म कुनुपर्ने उक्त स्रोतले नेपाल अटोलाई बतायो । कम्पनीले पहिलो लटमा २ दर्जन बढी आयोनिक ५ मगाएको थियो । प्रिमियम सेग्मेन्टको यो इलेक्ट्रिक कार नेपाल भित्रिएदेखि नै यसले इभी पारखीको ध्यान आकृष्ट गरिरहेको छ ।

बजारमा अहिले थुप्रै ब्रान्डका इलेक्ट्रिक कार उपलब्ध भएपनि आयोनिक ५ जत्तिको फिचर्स लोडेड प्रिमियम कार अन्य ब्रान्डसंग नभएका कारण अबको केही समयसम्म यो इलेक्ट्रिक कार चर्चामा रहिरहने र यसले प्रिमियम इभी खरिद गर्न चाहने ग्राहकलाई आकर्षित गरिरहने विश्वास कम्पनीले लिएको छ ।

हुन्डाईको नयाँ आयोनिक लाइनअप अन्तर्गत ‘स्पेशलाइज्ड इजीएमपी व्याट्री इलेक्ट्रिक भेइकल प्लेटफर्म’ मा बनेको यो कारको हाल दुई भेरिएन्ट उपलब्ध रहेको छ । जसमध्ये प्यानोरामिक सनरुफयुक्त भेरिएन्टको मूल्य ८० लाख ९६ हजार र सोलार सनरुफयुक्त भेरिएन्टको मूल्य ८१ लाख ९६ हजार रुपैयाँ तोकिएको छ । म्याट कलर किन्न चाहने ग्राहकले ६० हजार अतिरिक्त रकम थप गर्नुपर्नेछ ।