भारतीय बजारमा रेनोको पहिलो इलेक्ट्रिक कार आउँदै, कस्तो असर गर्ला टाटाको ईभीलाई ?

टाटाले हाल भारतीय इलेक्ट्रिक कार बजारमा आफ्नो प्रभुत्व जमाइरहेको छ र हाल टियागो ईभी र नेक्सन ईभीसँग प्रतिस्पर्धा गर्ने कुनै कार छैन । अहिलेसम्म टियागो ईभी र टिगोर ईभीका करिब ५० हजार युनिट बिक्री भइसकेको छ । तर अब टाटाका इलेक्ट्रिक कारसँग प्रतिस्पर्धा गर्न नयाँ ईभी चाँडै बजारमा आउने भएको छ ।

रेनोले ईभीको मागलाई ध्यानमा राख्दै १ वर्ष भित्र क्विड ईभी लन्च गर्ने तयारी गरिरहेको छ । कम्पनीले यसको मूल्य भने खुलाएको छैन तर यो कारको मूल्य ८ लाख भारु भन्दा कम हुने अनुमान गरिएको छ । यसको डिजाइन अलि फरक हुनेछ र यसमा बम्पर, लाइट र ग्रिल परिवर्तन गरिनेछ ।

कारमा डिजाइन बाहेक अन्य धेरै परिवर्तनहरू पनि देखिनेछ । कारको सस्पेन्सन पनि परिवर्तन हुनेछ । यसमा क्विडमा आउने हम्पी फ्लोर हटाइएको छ । साथै यसको इन्टेरियरमा ठूलो इन्स्ट्रयुमेन्ट क्लस्टर दिइनेछ भने ड्राइभरको डिस्प्ले डिजिटल हुनेछ । कारमा ३ देखि ४ वटा ड्राइभिङ मोड पनि हुनेछ ।

युरोपेली बजारमा बिक्री हुने क्विड ईभीमा केही परिवर्तन गरेर भारतमा लन्च गर्न सक्ने अनुमान गरिएको छ । यसमा २६.८ किलोवाटको ब्याट्री प्याक दिइएको छ, जसले ४४ बीएचपीको पावर जेनेरेट गर्छ । उक्त ब्याट्री प्याकले कारलाई फुल चार्जमा ४०० किलोमिटरसम्मको रेन्ज दिन्छ । यद्यपि यसबारे कम्पनीले अहिलेसम्म कुनै प्रतिक्रिया दिएको छैन ।

रेनो क्विड ईभीले भारतमा टाटा टियागो ईभी, सिट्रोन ईसी३ र एमजी कमेटसँग सीधा प्रतिस्पर्धा गर्नेछ । रेनोको विज्ञप्ति अनुसार कम्पनी ईभी योजनाका साथ अगाडि बढिरहेको छ र आगामी दिनहरुमा भारतमा धेरै इलेक्ट्रिक कार लन्च गरिनेछ । रेनोको पहिलो इलेक्ट्रिक कार ६० प्रतिशतसम्म लोकलाइज रूपमा उत्पादन हुनेछ ।