चीनमा निर्मित निसानको पहिलो पिकअप ट्रक लन्च, विश्व बजारमा बिक्री गरिने

निसानले चीनमा निर्मित आफ्नो पहिलो पिकअप ट्रक लन्च गरेको छ । झेङझाउ निसानले फ्रन्टियर प्रो सिरिज पिकअप ट्रक लन्च गरेको हो । जसको सुरुवाती मूल्य २३ हजार ८०० डलर निर्धारण गरिएको छ ।

कम्पनीका अनुसार, फ्रन्टियर प्रो निसानको लागि एउटा माइलस्टोन प्रोडक्ट हो, जसलाई पूर्ण रूपमा डिजाइन, विकास र उत्पादन चीनमा गरिएको छ । कम्पनीले यसलाई चिनियाँ बजारसहित विश्व बजारमा बिक्री गर्ने योजना बनाएको छ ।

इन्धन र प्लग–इन हाइब्रिड पावरट्रेनमा उपलब्ध यसको परम्परागत इन्धन संचालित मोडलले निसानको क्लासिक भी–मोसन डिजाइन ल्यांग्वेजलाई कायम राखेको छ । यसको विपरित, हाइब्रिड संस्करणले आधुनिक ईभी ट्रेन्डलाई अँगालेको छ।

फ्रन्टियर प्रोको इन्टेरियरमा डिजिटल इन्स्ट्रयुमेन्ट क्लस्टर र ठूलो सेन्ट्रल कन्ट्रोल स्क्रिन सहितको भौतिक बटनहरूको पङ्क्ति राखिएको छ । १२ स्पिकर जेएलए ब्रान्ड अडियो प्रणाली र व्यापक सफ्ट–टच सामग्रीद्वारा केबिन अनुभवलाई अझ माथि उठाइएको छ ।

सो नयाँ पिकअपको इन्धन भर्सनलाई २.० टी पेट्रोल र २.३ टी डिजेल इन्जिनको साथ उपलब्ध गराइएको छ । जसको अधिकतम पावर २५८ बीएचपीसम्म र टर्क ४०० एनएमसम्म रहेको छ । दुबै मोडलमा ८ स्पिड अटोमेटिक ट्रान्समिसन उपलब्ध गराइएको छ ।

त्यसैगरी हाइब्रिड भेरिएन्टमा १.५ टी इन्जिनलाई अगाडि माउन्ट गरिएको एकल इलेक्ट्रिक मोटरसँग जोडिएको छ, जसले ३२० किलोवाट पावर र ८०० एनएम टर्क जेनेरेट गर्दछ । यो ४ स्पिड डीएचटी ट्रान्समिसनसँग जोडिएको छ, जसले १३५ किलोमिटर ईभी रेन्ज प्रदान गर्ने दाबी गरिएको छ ।