गुडिरहेको महिन्द्रा ईभीमा आगलागी, कम्पनीले के भन्यो ?

महिन्द्राले हालै लन्च गरेको बिद्युतीय कार बीई६ गुडिरहेकै अवस्थामा आगलागी भएको छ । भारत उत्तर प्रदेशको हापुर जिल्लामा सडकको बीचमा महिन्द्राको उक्त कार आगलागीमा परेको हो । गत आइतबार भएको उक्त आगलागी पछि यस घटनाको भिडियो अहिले सामाजिक सञ्जालमा भाइरल बनिरहेको छ ।

यो घटनापछि, सर्ट सर्किटका कारण कारमा आगो लागेको अनुमान व्यापक भएको थियो । यद्यपि, महिन्द्राले कारको ब्याट्री आगलागीको कारण नभएको बताएको छ ।

कम्पनीले गाडीको सेन्सर र सफ्टवेयर डायग्नोस्टिक डेटलाई आधार मानेर यो घटना ईभी ब्याट्रीसँग सम्बन्धित नभएको धारणा बनाएको हो । प्रारम्भिक बडी परीक्षणले पनि यो पुष्टि गरेको उसको भनाई छ ।

महिन्द्राका अनुसार, गाडीको टायर अत्यधिक तातो भएको बारेमा स्क्रिनमा अलर्ट प्राप्त भएको थियो । त्यसपछि सिस्टमले सावधानीका रूपमा गाडीको गति घटाउँदा मानविय क्षति हुन पाएन । गाडीको गती घटेपछि चालक र यात्रु कारबाट सजिलै सकुशल बाहिर निस्किए र कोही पनि घाइते भएनन् ।