महिन्द्रा थारको प्रतिस्पर्धी जिम्नी ५ डोर, यस्तो छ फिचर र पावरट्रेन

भारतको सवैभन्दा ठूलो प्यासेन्जर कार निर्माता मारुती सुजुकीले नयाँ दिल्लीमा जारी अटो एक्सपोमा इलेक्ट्रिक कारको इभिएसक्स कन्सेप्टसंगै अन्य २ नयाँ एसयूभीलाई समेत प्रदर्शनीमा राखेको छ । सुजुकीले यी दुई नयाँ एसयूभीमध्ये जिम्नी ५ डोरको ग्लोवल प्रिमियर गरेको छ भने अर्को नयाँ एसयूभी फ्रंक्सलाई सार्वजनिक गर्दै वुकिङ समेत खुल्ला गरेको छ ।

जिम्नी ५ डोरलाई सुजुकीले यसै वर्षको मध्येतिर लन्च गर्ने जनाएको छ । यो लाइफ स्टायल अफरोड एसयूभीको सवैभन्दा पहिला भारतमा बिक्री शुरु हुने र त्यसपछि अन्तराष्ट्रिय बजारमा पठाइने कम्पनीको भनाई छ । ल्याडर फ्रेम चेसिसमा आधारित यो एसयूभी फोर ह्विल ड्राइभमा उपलब्ध हुने र यसले महिन्द्राको निकट भविषयमा आउने तयारी भइरहेको ५ डोर थारसंग प्रतिस्पर्धा गर्ने अनुमान गरिएको छ ।

जिम्नीलाई सुजुकीले १.५ लिटर पेट्रोल इन्जिनमा माइल्ड हाइव्रिड टेक्नोलीजीका साथ बजारमा उतार्न लागेको हो । यसमा आइडल स्टार्ट÷स्टप टेक्नोलोजी समेत उपलब्ध हुनेछ । यो एसयूभीको पावर १०५ पिएस र टर्क १३४ एनएम रहने दावी गरिको छ । यो ५ स्पिड म्यानुल र ४ स्पिड टर्क कन्भर्टर अटोमेटिक अप्सनमा उपलब्ध हुनेछ । जिम्नीको ग्राउन्ड क्लिरियन्स २१० एमएम र ह्विलवेश २५९० एमएम लामो हुनेछ ।

यो अफरोड एसयूभीमा एचडी डिस्प्ले सहितको ९ इन्चको स्मार्ट प्ले प्रो प्लस इन्फोटेन्मेन्ट सिस्टम, वायरलेस एप्पल कार एवं एन्ड्रोइड अटो कनेक्टिभिटी, अर्कामिजको साउन्ड सिस्टम, ६ वटा एयरव्याग, व्रेक लिमिटेड स्लिप डिफ्रेन्सियल, हिल होल्ड एसिस्ट सहितको इएसपी, हिल्ड डिसेन्ट कन्ट्रोल, रियर भ्यू क्यामेरा र इविडी सहितको एविएस लगायत आधुनिक फिचर उपलब्ध गराइएको छ ।