आकर्षक डिजाइन र फरक विशेषता सहित दुई मोडलका इलेक्ट्रिक स्कुटर सार्वजनिक

काठमाडौं – नेपाली भुबनोटलाई आधार मानेर विकसित गरिएको एफडी ब्रान्डका दुई मोडलका इलेक्ट्रिक स्कुटर सार्वजनिक गरिएको छ । नेपाली युवाहरुको समूहद्वारा संचालित ग्रन्थ ईभी एफडीका एफ५ र एफ५–ए मोडलका इलेक्ट्रिक स्कुटर सार्वजनिक गरिएको हो ।

इटालियन इन्जिनियरद्वारा डिजाइन गरिएको इलेक्ट्रिक स्कुटरको एसेम्बल चीनमा गरिएको हो । तर ग्रन्थ ईभीकै समन्वयमा यसमा आवश्यक विशेषताहरु उपलब्ध गराइएको छ । ‘लामो समयको अध्ययन अनुसन्धान पश्चात नेपाली बजारलाई लक्ष्यित गरी स्कुटरमा आवश्यक फिचर उपलब्ध गराइएको छ ।’ ग्रन्थ ईभीका संस्थापक तथा सीईओ सुजन ढुंगेलले भने ।

स्कुटरमा प्रयोग गरिने विभिन्न पार्ट्स र अन्य सामग्री विभिन्न कम्पनीद्वारा उत्पादन गरिएका र ती सबै सामग्री ग्रन्थ ईभीकै समन्वयमा उपलब्ध गराइएको सीओओ जीवन कुमार क्षेत्रीले बताए ।

नेपाली बजारमा हाल उपलब्ध इलेक्ट्रिक स्कुटरको तुलनामा एफडी मोटर्सका स्कुटर फरक भएको कम्पनीको भनाइ छ । यो स्कुटरमा साइड ड्राइभ मोटरको प्रयोग गरिएको छ । यो टायरको साइडमा जोडिएको हुन्छ । यसले गर्दा उकालोमा पनि राम्रो पर्फमेन्स दिन्छ भने स्कुटर अगाडि हुत्तिने हुँदैन ।

यसमा लिथियम फेरो फस्फेट अर्थात एलएफपी ब्याट्री जोडिएको छ, जसको क्षमता २ हजार साइकल हुन्छ । लिड एसिड र लिथियम आयोन भन्दा यो ब्याट्रीको आयु धेरै लामो हुन्छ ।

यसमा भएको अर्को विशेषता क्यान बस कम्युनिकेसन कन्ट्रोलर हो । यसकारण स्कुटरमा कुनै समस्या आएमा सोझै पत्ता लगाउछ र अगाडि डिस्प्लेमा देखाउछ । यसबाट स्कुटर मर्मत गर्न सजिलो हुन्छ ।

यसको ग्राउन्ड क्लियरेन्स बढाउनका लागि १६ र १४ इन्चको टायर प्रयोग गरिएको छ । नेपाली बजारमा उपलब्ध इलेक्ट्रिक स्कुटर मध्ये यो ठूलो टायर भएको मानिन्छ । यसबाट स्कुटर चलाउन पनि सहज हुन्छ ।

दुबै स्कुटरमा ब्याट्री ब्रेक रिजेनेरेटेड सिस्टम प्रयोग गरिएको छ । यसले गर्दा ब्रेक हान्दा खर्च भएको शक्तिले फेरि ब्याट्रीमा आएर रिचार्ज हुन्छ, जसले गर्दा रेन्ज बढी दिनेछ । स्कुटरमा फास्ट चार्जर प्रविधि पनि राखिएको छ ।

एफ५ मोडलमा ६० भोल्ट ३० एएच ब्याट्री रहेको छ भने एफ५–एमा ६० भोल्ट ४५ एम्पियरको ब्याट्री प्रयोग गरिएको छ । त्यसैगरी दुवै स्कुटरमा ३ हजार वाटको मोटर रहेको छ ।

ब्याट्रीमा ३ वर्ष र मोटरमा २ वर्षको वारेन्टी रहेको छ  । साढे चार घण्टामा स्कुटर फुल चार्ज हुनेछ  । फास्ट चार्जरले यसलाई २ घण्टामा चार्ज गर्न सकिन्छ । एक पटक चार्ज गरेपछि एफ५ ले ७० देखि ९० किलोमिटर र एफ५–एले ९० देखि ११० किलोमिटरसम्म रेञ्ज दिनेछ ।

एफ५ को मूल्य २ लाख ४८ हजार ९९९ र एफ५–एको मूल्य २ लाख ८९ हजार ९९९ रुपैयाँ तोकिएको छ । प्रिमियम स्कुटर भएकाले हाल कुनै पनि छुट उपलब्ध नगराइएको कम्पनीको भनाइ छ ।

यद्यपि विभिन्न अफर भने उपलब्ध गराइएको छ । एक वर्ष सम्म स्कुटर चढ्दा खर्च हुने बिजुलीको बिलको पैसा कम्पनीले आफै तिरिदिने बताइएको छ । यसका साथै ग्रन्थ ईभीले संस्थागत सामाजिक उत्तरदायीत्व अन्तर्गत बिक्री भएका प्रत्येक स्कुटरबाट ५०० रूपैयाँ महावीर पुनको राष्ट्रिय आविष्कार केन्द्रलाई दिने जनाएको छ ।

आगामी दिनमा नेपालमै यो स्कुटर एसेम्बल गर्ने तयारी भइरहेको ग्रन्थ ईभीले जनाएको छ ।