कुनै समयमा खिल्ली उडाइएको कार अहिले सबैभन्दा लोकप्रिय

कुनै समय डब्बा गाडी भनेर खिल्ली उडाइएको मारुती सुजुकी वागनआर आज बिक्रीको मामिलामा सबैभन्दा अब्बल सावित भएको छ । सो कारले लाखौं मध्यमवर्गीय परिवारको सस्तोमा कार किन्ने सपना साकार पारेको छ । उत्कृष्ट माइलेज, कम्फर्ट र इन्जिनका कारण सो कार निकै नै लोकप्रिय बनेको छ ।

मारुती सुजुकी वागनआरको पहिलो जेनेरेशनको मोडल सन् १९९८ मा भारतमा लन्च भएको थियो । हालसम्म सो कारमा धेरै अपडेट र सुधारहरू भइसकेको छ । साथै, यसको डिजाइन र लुक पनि पहिलेको तुलनामा धेरै आकर्षक बनेको छ । हाल सो ५–सीटर ह्याचब्याक कार सानो परिवारको लागि उत्तम कार भएको छ ।

ग्लोबल एनसीएपीले वागनआरलाई सुरक्षाको मामिलामा धेरै अब्बल सावित नगरे पनि बिक्रीमा भने सो कार अघि नै छ । सो कार भारतमा नोभेम्बर २०२३ मा १६ हजार ५६७ युनिट, सेप्टेम्बरमा १६ हजार २५० युनिट र अक्टुबरमा २२ हजार ८० युनिट बिक्री भएको थियो । नेपालमा पनि यसको राम्रो बजार छ ।

कम्पनीले वायनआरको बेस मोडलमा १.० लिटर के–सिरिज इन्जिन उपलब्ध गराएको छ भने शीर्ष मोडलमा १.२ लिटर इन्जिन समावेश गरिएको छ । यसको १.२ लिटर पेट्रोल इन्जिनले ८८.५ बीएचपी पावर र ११३ एनएमको टर्क जेनेरेट गर्छ । वागनआरको पेट्रोल इन्जिनले २५ किलोमिटर प्रतिलिटर माइलेज दिन्छ ।

वागनआरमा ७ इन्चको टचस्क्रिन डिस्प्ले, ४–स्पिकर म्युजिक सिस्टम, स्टेयरिङ माउन्टेड अडियो कन्ट्रोल र स्मार्टफोन नेभिगेसन जस्ता फिचरहरू छन् । यात्रुको सुरक्षाका लागि ड्युअल फ्रन्ट एयरब्याग, एबीएससहित ईबीडी, रियर पार्किङ सेन्सर र हिल होल्ड असिस्ट (एएमटी भेरियन्टमा मात्र) जस्ता फिचरहरू उपलब्ध गराइएको छ ।

नेपाली बजारमा वागनआर विभिन्न दुई भेरिएन्टका तीन मोडलमा उपलब्ध छ । १.० लिटरको वागनआरको मूल्य २९ लाख ९९ हजार रुपैयाँ छ भने १.२ लिटर जेडएक्सआईको मूल्य ३१ लाख ९९ हजार र जेडएक्सआई प्लसको मूल्य ३३ लाख ४९ हजार रुपैयाँ छ ।

वागनआरले मारुती सुजुकीकै सेलेरियो, टाटा टियागो र सिट्रोएन सी ३ जस्ता कारसँग प्रतिस्पर्धा गर्छ ।