अब सार्वजनिक सवारी चढ्दा फेस सिल्ड अनिवार्य

काठमाडौं – सार्वजनिक सवारी साधनमा चढ्न यात्रुले पनि फेस सिल्ड अनिवार्य लगाउनु पर्ने भएको छ । यातायात व्यवस्था विभागले बस चढ्नुअघि अनिवार्य रुपमा फेस सिल्ड लगाउनु पर्ने र यात्रुले नै फेस सिल्डको व्यवस्था गर्नेु पर्ने बताएको छ ।

सरकारले गत २६ गतेदेखि नै सार्वजनिक सवारीले सिट क्षमतामा यात्रु राख्न पाउने निर्णय गरेको थियो । त्यसकारण भौतिक दुरी कायम हुन नसक्ने भन्दै सवारीमा यात्रा गर्ने बेला फेस सिल्ड अनिवार्य गरिएको विभागका निर्देशक तथा प्रवक्ता लोकनाथ भुसालले बताएका छन् ।

विभागले सवारी साधनले पुरै क्षमतामा यात्रु राख्न पाउने भएकाले यात्रुलाइ बढी भाडा नतिर्न आग्रह गरेको छ । यस अधि सरकारले आधा सिटमा मात्रै यात्रु बोक्दा ५० प्रतिशतसम्म बढी भाडा लिन पाउने व्यवस्था गरेको थियो ।