बैशाखमा सुन्दर यातायातका थप ९ विद्युतीय बस आउँदै

काठमाडौं – सुन्दर यातायातले आगामी वैशाखमा चीनबाट थप ९ वटा विद्युतीय बस काठमाडौं ल्याउने भएको छ । बसहरू चीनमा तयार भइसकेको र नेपाल ल्याउने तयारी भइरहेको सुन्दर यातायातका अध्यक्ष भेषबहादुर थापाले जानकारी दिएका छन् ।

४० सिट क्षमताका ती ९ वटा बस तयारी अवस्थामा छन् । सरकारले विद्युुतीय बस सञ्चालनमा प्रोत्साहन गरेपछि सुन्दर यातायातले एउटा बसको एक करोड ७२ लाख रुपियाँमा २५ वटा बस खरिदको सम्झौता गरेको छ । जसमध्ये ९ वटा बस पहिलो चरणमा ल्याइने भएको कम्पनीको भनाइ छ ।

सुन्दर यातायातले काठमाडौँ उपत्यकामा ४ वटा विद्युतीय बस सञ्चालन गरिरहेको छ । तीनवटा चक्रपथ र एउटा सूर्यविनायक–रत्नपार्क रुटमा सञ्चालन गरिरहेको छ । ती बस युरो मापदण्डका हुन् । सुन्दर यातायातले चितवनमा पनि विद्युतीय बस सञ्चालन गर्ने भएको छ ।

सुन्दर यातायातले आगामी दिनमा अपांगमैत्री विद्युतीय बस समेत ल्याउने बताएको छ । नेपाली बजारमा हाल चलिरहेको सुन्दर यातायातका विद्युतीय बसले चर्चा पाइरहेका छन् ।