ईभी इजी ट्याक्सीहरुको मोटर बीमा सलिको इन्स्योरेन्सले गर्ने

काठमाडौं – सगरमाथा लुम्बिनी इन्स्योरेन्स कम्पनी लिमिटेड (सलिको) र सरिना जी ट्रेड प्रालिबीच बीमा सेवा सम्बन्धी एक सम्झौता पत्रमा हस्ताक्षर भएको छ ।

सम्झौतापत्र अनुसार सरिना जी ट्रेडमार्फत बिक्री गरिने ईभी इजी ट्याक्सीहरुको मोटर बीमा सलिको इन्स्योरेन्सले गर्ने भएको हो ।

सम्झौतापत्रमा सलिको इन्स्योरेन्सको तर्फबाट प्रमुख कार्यकारी अधिकृत चंकी क्षेत्री तथा सरिना जी ट्रेडको तर्फबाट प्रमुख कार्यकारी अधिकृत अजय महतोले हस्ताक्षर गरेका छन् ।

सरिना जी ट्रेडबाट विक्री गरिने विद्युतीय सवारीसाधनहरुकोे व्यापक सवारी साधन बीमा सलिको इन्स्योरेन्सबाट हुनेछ । उक्त सवारी साधन अन्तर्गत भविष्यमा कुनै दावी परेमा बीमा कम्पनीले दावी भूक्तानी प्रक्रियालाई थप सरल, सहज, नगदरहित तथा शीघ्र भुक्तानी गर्ने समेत जनाइएको छ ।

सरिना जी ट्रेडर्सले हालै ईभी इजी ट्याक्सी नेपाल भित्र्याएको हो । जेएमईभी ब्रान्डको सो ईभी इजी ट्याक्सीको मूल्य ४१ लख ५० हजार रुपैयाँ तोकिएको छ ।

ईभीइजी ट्याक्सीमा ४९ किलोवाट आवरको ब्याट्री प्याक र ९९ किलोवाट क्षमताको मोटर जडान गरिएको छ । सिंगल चार्जमा यसले ४३० किलोमिटर रेन्ज दिने दाबी गरिएको छ । यसको अधिकतम टर्क २२५ एनएम तथा पावर १३४.६ पीएस छ ।

एसी र डीसी दुबै चार्जर सपोर्ट गर्ने यस ईभीलाई डीसी फास्ट चार्जरको साहयतामा ३० मिनेटभित्रै ३० देखि ८० प्रतिशतसम्म चार्ज गर्न सकिन्छ । साथै, एसी चार्जरले ९ घण्टा र डीसी चार्जरले १ घण्टा १५ मिनेटमा फुल चार्ज गर्न मिल्छ । कम्पनीले यसको ब्याट्रीमा ८ वर्ष अर्थात १ लाख ५० हजार र मोटरमा ३ वर्ष अर्थात ६० हजार किलोमिटर वारेन्टी दिएको छ ।