७ महिनामा १३ अर्ब मूल्यका ५ हजार ८९६ ईभी आयात

काठमाडौं –चालु आर्थिक वर्षको साउनदेखि माघसम्म नेपालमा ५ हजार ८९६ युनिट विद्युतीय गाडी (ईभी) आयात भएका छन् ।

भन्सार विभागको तथ्याङ्कअनुसार १३ अर्ब ८५ करोड १ लाख ३५ हजार रुपैयाँ बराबरका ईभी भित्रिँदा सरकारलाई ८ अर्ब ४६ करोड २६ लाख ७७ हजार रुपैयाँ राजश्व प्राप्त भएको छ ।

गत आर्थिक वर्षको सोही अवधिको तुलनामा ईभी आयात ५.७८ प्रतिशतले घटेको छ । गत वर्षको सोहि अवधीमा ६ हजार २५६ युनिट ईभी आयात भएका थिए ।

७ महिनाको अवधिमा ५० किलोवाटसम्मका १ हजार ९९२ युनिट, ५१ देखि १०० किलोवाटसम्मका ३ हजार ४०२, १०१ किलोवाटदेखि २०० किलोवाटसम्मका ४९३ र २०१ किलोवाट माथिका ७ युनिट ईभी भित्रिएका छन् । त्यस्तै, ५० किलोवाटसम्मका दुई युनिट अनएसेम्बल विद्युतीय कार आयात भएको छ ।

यसैगरी माघसम्म ५ हजार ६९ वटा तीन पाङ्ग्रे ईभी आयात भएका छन्, जसको मूल्य ५१ करोड ७८ लाख १७ हजार रुपैयाँ बराबर रहेको विभागको तथ्याङ्कमा उल्लेख छ ।