नाडा अटो शो–२०२४ मा इलेक्ट्रिक गाडीको दबदबा, यी ब्राण्ड हुँदैछन् सहभागी

काठमाडौं– नाडा अटो शो–२०२४ मा इलेक्ट्रिक गाडीको दबदबा देखिने भएको छ । भदौ ११ देखी १७ गतेसम्म अयोजना हुने उक्त शोमा इलेक्ट्रिक कार र भ्यान सहित ३ दर्जन ब्राण्डले सहभागिता जनाउन लागेको हुन् । मेलामा इलेक्ट्रिक टु–हिलरको सहभागिता समेत उल्लेख्य रुपमा हुनेछ ।

अटो शो–२०२४ मा सबैभन्दा बढी सिजी मोटर्सले ८ वटा ब्राण्डलाई शोकेस गर्ने भएको छ । सिजी मोटर्सले नेटा, आयोन वाई, एक्सपेङ, अवतार, राडार, केवाईसी र किङलङ ब्राण्डका इलेक्ट्रिक गाडी तथा हिरो ब्राण्डको मोटरसाकललाई शोकेस गर्न लागेको हो । कम्पनीले मेला स्थलबाटै एक्सपेङ, अवतार र राडार ब्राण्डलाई पहिलोपटक औपचारिक लन्च गर्ने योजना समेत बनाएको छ ।

सिजी मोटर्सपछि सबैभन्दा बढी ब्राण्ड एमएडब्लुले शोकेस गर्नेछ । उक्त ग्रुप अन्तर्गत बिक्री हुँदै आएका दिपल, सेरेस, र फोटोन ब्राण्ड मेलामा देखिने भएका हुन् । यसैगरी यो ग्रुपले पहिलोपटक नामी र सोकोन ब्राण्डलाई मेलास्थलबाटै औपचारिक लन्च गर्ने तयारी गरेको छ । एमएडब्लु ग्रुपले यामाहा मोटरसाइकललाई समेत प्रदर्शनीमा राख्नेछ ।

शारडा ग्रुपले ओमोडा र जीकर ब्राण्डका इलेक्ट्रिक कारलाई शोकेस गर्ने भएको छ । जसमध्ये जीकरलाई कम्पनीले पहिलोपटक औपचारिक लन्च समेत मेलास्थलबाटै गर्न लागेको हो । सांग्रिला मोटर्स सिट्रोन र लिप मोटर्सका ईभी लिएर मेलामा सहभगी हुँदैछ भने लक्ष्मी ग्रुप हुन्डाई ब्राण्डका ईभी तथा कम्वसन गाडी र नयाँ ब्राण्ड काईलाई लिएर सहभागी हुँदैछ ।

यसैगरी, मेलामा सिप्रदीले टाटा ब्राण्डका ईभी तथा कम्वसन गाडी, पारामाउन्ट मोटर्सले एमजी र बुलिङ, कन्टिनेन्टल ट्रेडिङले किया ब्राण्डका ईभी तथा कम्वसन गाडी, साइमेक्स ईकंले बीवाइडी,जी मोटर्सले स्काइवेल र एस क्यूप इन्टरप्राइजेजले हेनरी एबं भोल्ट्स ब्राण्डका ईभीलाई शोकेस गर्नेछन् ।

मेलामा इलेक्ट्रिक भ्यानको सहभागिता समेत उल्लेख्य रुपमा हुने भएको छ । इलेक्ट्रिक भ्यान तथा माइक्रोवस अन्तर्गत फोटोन, केवाईसी, किङलङ, एसआरएम, गोनाओ, स्काईवर्थ, डोङफेङ, सिएचटिसी, कामा, बिएडब्लु, डिएफएसके र वुलिङ ब्राण्ड सहभगाी हुनेछन् ।

मोलमा २ दर्जन हाराहारी ब्राण्डका इलेक्ट्रिक टु–ह्विलर, विभिन्न ब्राण्डका अटो कम्पोनेन्ट, ग्यारेज इक्विपमेन्ट, लुब्रिकेन्ट्स, टायर, ब्याट्री र बैंक तथा वित्तिय संस्था गरी कुल १०० हाराहारी स्टल रहने आयोजक संस्था नाडा अटोमोबाइल्स एसोसिएसन अफ नेपालले जनाएको छ ।