चीनमा विद्युतीय कारको बिक्री १४५ प्रतिशतले बृद्धि भयो, पेट्रोलियम कारको बिक्री घट्यो

चीनमा सन् २०२१ मा बिद्युतीय कारको बिक्री १४५ प्रतिशतले वृद्धि हुँदा पेट्रोलियम पदार्थबाट चल्ने कारको बिक्री भने ४ प्रतिशतले घटेको छ । यो बर्ष चीनमा कुल २ करोड १ लाख युनिट कार बिक्री भएको थियो । यो सन् २०२० को तुलनामा ४ प्रतिशतले बढी हो ।

कोरोना महामारी र बिश्वव्यापी सेमिकन्डक्टर अभावका बाजवुद चीनमा यो बर्ष यति धेरै संख्यामा प्यासेन्जर कारको बिक्री बढेपछि यसको प्रमुख कारणका रुपमा विद्युतीय र हाइब्रिडका कारको माग बढ्नुलाई लिइएको छ । २०२१ को मध्यसम्ममा चीनमा कुल २६ लाख ५० हजार बिद्युतीय कार बिक्री भएको थियो । जुन अघिल्लो बर्षको सोही अवधिमा बिक्री भएको ईभीको तुलनामा १६८ प्रतिशतले बढी हो ।

उक्त बर्ष टेस्लाले कुल ७१ हजार कार बिक्री गरेको थियो भने चीनको आफ्नै उत्पादनको बजार हिस्सा निकै ठूलो रहेको छ । कम मूल्य पर्ने वुलिङ होङ्गग्वाङ्ग मिनी ईभी, ग्रेटवालन ओरा आर१, चेरी इक्यू, एसएआइसी रोवे क्लेभर, वाओजन लगायत ब्रान्डका कारहरु अत्यधिक मात्रामा बिक्री भएका थिए ।

विश्को सबैभन्दा ठूलो कार बजार चीन इलेक्ट्रिक भेइकलका लागि समेत सबैभन्दा ठूलो बजार हो । पछिल्लो ३ बर्षयता यहाँको बजारमा ईभीको बिक्री १०० प्रतिशतभन्दा बढीले बृद्धि हुँदै आएको छ । यो बर्षसमेत यहाँको प्यासेन्जर कार बजार ५ प्रतिशत हाराहारीले बढ्ने प्रक्षेपण गरिएको छ ।