अर्थमन्त्री र अर्थसचिवले टेस्ट राइड गरे पश्चात फेरि चर्चामा विद्युतीय मोटरसाइकल ‘यात्री’

काठमाडौं – नेपाली युवा व्यवसायीहरुको स्टार्ट अप कम्पनी यात्री मोटरसाइकल्सले बनाएको यात्री मोटरसाइकल अर्थमन्त्री जनार्दन शर्मा र अर्थसचिव मधुकुमार मरासिनीले टेस्ट राइड गरेका छन् ।

गत मंगलबार गरिएको उक्त टेस्ट राइड पश्चात यस सम्बन्धी तस्बिर सामाजिक सञ्जालमा भाइरल बनेका छन् । आफूहरुले स्थानीय उत्पादनलाई प्रवद्र्धन गर्ने उद्देश्यका साथ टेस्ट राइड गरेको मन्त्री र सचिवको भनाइ छ ।

जे भए पनि एक पटक फेरि यात्री मोटरसाइकल भाइरल बनेको छ । असिम पाण्डे र उनको समूहले उत्पादन गरेका यी मोटरसाइकल पहिले पनि चर्चामा छन् ।

यात्री मोटरसाइकलले पी–० र पी–१ गरी दुई विद्युतीय मोटरसाइकल सार्वजनिक गरेको थियो । पी–० को मूल्य १९ लाख ४९ हजार र पी–१ को मूल्य ४ लाख ९५ हजार रुपैयाँ तोकिएको छ ।