सागरले बनाए विद्युतीय मोटरसाइकल, विद्यालयले दियो पुरस्कार

काठमाडौं – अर्घाखाँचीका सागर पोखरेलले ब्याक गियरसहितको विद्युतीय मोटरसाइकल बनाएका छन् । नवीन औद्योगिक कदर बहादुर रीता माध्यमिक विद्यालयमा कक्षा १२ मा सिभिल इन्जिनियरिङ पढिरहेका पोखरेलले बनाएको विद्युतीय मोटरसाइकलले हाल निकै नै चर्चा पाएको छ ।

यसै अवसरमा उनी अध्ययनरत विद्यालयले एक कार्यक्रमका बीच ५१ हजार रुपैयाँ पुरस्कार प्रदान गरेको छ ।

हजुरबुबा मोतिलाल, बुबा अनन्तमणि, आफ्नो नाम सागर र आमा भगवता पोख्रेलको पहिलो अक्षरबाट मोटरसाइकलको नाम एमएएसबी राखेको पोखरेलले बताए। ब्याट्री लिड एसिड प्रयोग भएको मोटरसाइकलमा करीब ४८ भोल्ट डिसी पावर छ।

मोटरसाइकल हाल १०० किलोमिटरसम्म दूरी हिँड्न सक्छ भने पिकअप ४० किलोमिटर प्रतिघण्टा रहेको दाबी पोखरेलको छ। यसअघि रोबर्ट, एक्साभेटर, फ्रिज, फोटोकपी मेसिनहरु समेत बनाएका पोखरेलले विभिन्न मोटरसाइकलका हेडलाइट, टेललाइट, स्प्रिङ तथा ७५० वाटको इलेक्ट्रिक मोटर प्रयोग गरेर उक्त मोटरसाइकल बनाएका हुन्।