होन्डा र सोनीको सहकार्य घोषणा : २०२५ मा इलेक्ट्रिक कार लन्च गर्दै, २०३० सम्म ३० ईभी ल्याउने

जापानी कार निर्माता कम्पनी होन्डा र टेक कम्पनी सोनीले सन् २०२५ मा इलेक्ट्रिक कार लन्च गर्न साझेदारी गरेका छन् । होन्डाका अनुसार कम्पनीले सन् २०३० सम्ममा ३० वटा इलेक्ट्रिक कार लन्च गर्ने र यस अवधिमा विश्वभर हरेक वर्ष २० लाख इलेक्ट्रिक गाडी उत्पादन गर्नेछ ।

होन्डाले कार निर्माण र बिक्रीमा आफ्नो विशेषज्ञता प्रयोग गर्नेछ, जबकि सोनीले यसको सफ्टवेयर र प्रविधिलाई समर्थन गर्नेछ । होन्डाका वरिष्ठ कार्यकारी यासुहिदे मिजुनोले यसको अध्यक्ष र सीईओको रूपमा काम गर्नेछन् । सोनीका कार्यकारी उपाध्यक्ष इजुमी कावानाशी अध्यक्ष र प्रमुख अपरेटिङ अफिसर हुनेछन् । प्रत्येक कम्पनीले संयुक्त रुपमा ६ बिलियन येन लगानी गर्नेछ ।

यस वर्षको सुरुमा होन्डाले जनरल मोटर्स (जीएम) सँग कम लागतको ईभी मोडल विकास गर्ने बताएको थियो, जुन नयाँ संयुक्त प्लेटफर्ममा आधारित हुनेछ । यसमा होन्डा र जीएमले २०२४ मा २ वटा इलेक्ट्रिक ईभी उत्पादन सुरु गर्ने योजना बनाएका छन् ।

होन्डाले सन् २०२० मा आफ्नो सानो इलेक्ट्रिक कार ‘होन्डा–ई’ विश्व बजारमा ल्याएको थियो । कारमा सानो ब्याट्री छ, जसले फुल चार्जमा २८० किलोमिटरको रेन्ज दिन्छ । होन्डा–ईले २०२१ वल्र्ड अर्बन कार अफ द ईयरको उपाधि जितेको थियो । होन्डाले कार बाहेक २ ह्विललाई पनि इलेक्ट्रिकमा रूपान्तरण गर्ने योजना बनाएको छ ।