१२० किलोमिटर रेन्ज दिने एड्भान्स फिचर सहित हाई स्पिड इलेक्ट्रिक स्कुटर ईभी सोल

इलेक्ट्रिक सवारी साधन निर्माता ईभी इन्डियाले इलेक्ट्रिक टु ह्वील सेगमेन्टमा नयाँ मोडल सोल लन्च गरेको छ । सो मोडल मंगलबार नयाँ दिल्लीमा लन्च गरिएको थियो । सो ई–स्कुटरले फुल चार्जमा १२० किलोमिटरसम्मको रेन्ज प्रदान गर्छ । स्कुटर ३ देखि ४ घन्टामा १०० प्रतिशतसम्म चार्ज गर्न सकिन्छ । यसको टप स्पिड ६० किमी प्रतिघन्टा छ । नयाँ ईभी सोल स्कुटरको मूल्य १ लाख ३९ हजार भारु राखिएको छ ।

कम्पनीले भविष्यलाई ध्यानमा राखेर हाई स्पिड इलेक्ट्रिक सवारी साधनको क्षेत्रमा प्रवेश गरेको हो । ईभी इन्डियाको लन्चिङको शुभारम्भमा कम्पनीका सह–संस्थापक र निर्देशक हर्षवर्धन दिडवानियाले भविष्यको लागि स्वच्छ, सुरक्षित र दिगो ऊर्जा स्रोत सुनिश्चित गर्नको लागि ई–स्कुटर उत्पादन सुरू गरेको जानकारी दिएका छन् ।

ईभी इन्डियाले ईभी इन्डियाको हाई स्पिड टू–व्हीलर उत्पादनको लागि शोध, अनुसन्धान, डिजाइन, उत्पादन, रणनीतिक साझेदारी, सप्लाई चेन र साझेदारीमा करिब ८० करोड भारु लगानी गरेको छ ।

ईभी सोल एक पूर्ण लोडेड हाई स्पिड स्कूटर हो । यसको अन्य फिचरमा एन्टी थेफ्ट लक सिस्टम, जीपीएस नेभिगेसन, यूएसबी पोर्ट, कीलेस एक्सपेरियन्स, रिभर्स मोड, सेन्ट्रल ब्रेकिङ सिस्टम, जियो ट्यागिङ र जियो फेन्सिङ समावेश गरिएको छ । सो स्कुटरमा तीन वर्षको वारेन्टी दिइएको छ । स्कूटरमा एड्भान्स लिथियम फेरस फस्फेट ब्याट्री सुसज्जित छ । जसलाई परिवर्तन गर्न र छुट्याउन सकिन्छ ।

कम्पनीले २०२७ सम्ममा २० लाख इलेक्ट्रिक भेइकल निर्माण गर्ने लक्ष्य राखेको छ । ईभीको म्यानुफ्याक्चरिङ युनिट १०० एकड क्षेत्रफलमा फैलिएको छ । इलेक्ट्रिक सोधनको म्यानुफ्याक्चरिङ प्लान्टमा निर्माण, परीक्षण, भेइकलको एसेम्बलिङ र लाइन टेस्टिङको लागि इको सिस्टम उपयोग गरिएको छ । कम्पनीसँग १०० भन्दा बढी डिलर र ५० सब–डिलरहरूको नेटवर्क छ ।

भारतमा उत्पादन भएका अधिकांश उत्पादन नेपाली बजारमा समेत उपलब्ध हुने भएकाले भविष्यमा यो स्कुटर पनि नेपालमा उपलब्ध हुने अनुमान गर्न सकिन्छ ।