पुरानो बाइकलाई इलेक्ट्रिक बनाउदै युवाहरु

काठमाडौं – आफूसँग भएका पुराना बाइकलाई इलेक्ट्रिक बनाउने कार्यमा अहिले विभिन्न संस्थाहरु लागिपरेका छन् । यसै सन्दर्भमा ब्रेनक्युव रिसर्च अर्गनाइजेसन अन्तर्गतको ई–वाहनले यस्तो कार्य गरिरहेको छ ।

ब्रेनक्युवका एक्जिक्युटिभ डाइरेक्टर आकाश देवका अनुसार यो समूहले हाल चितवनमा करिव ३० वटा बाइकलाई इलेक्ट्रिकमा परिवर्तन गर्ने तयारी गरिरहेको छ । केही दिन पहिले राजधानीको भृकुटीमण्डपमा सम्पन्न क्यान इन्फोटेकमा यो समूहले बाइकलाई इलेक्ट्रिकमा परिवर्तन गर्न सकिने र यसको प्रक्रिया वारेमा जानकारी दिएको थियो ।

पुल्चोक र थापाथली इन्जिनियरिङ क्याम्पसका विद्यार्थीहरु समेत सहभागी यो समूहले पुराना सवारी साधनलाई इलेक्ट्रिक बनाउन सकिने र यसको लागि करिव १ लाख २० हजार रुपैयाँ हाराहारी खर्च लाग्ने बताएको छ ।

भविष्यमा ट्राफिक कार्यालयमा थुप्रिएका पुराना सवारी साधनलाई समेत यसरी रुपान्तरण गर्ने योजना यो समूहको छ । यद्यपि हाल यसका लागि कानुन निर्माणको क्रममा रहेको र आवश्यक तयारी भइरहेको देवले बताए । यदि त्यसो भयो भने ट्राफिक कार्यालयमा थुप्रिएका हजारौ सवारी साधन उपयोगी बन्न सक्ने छन् ।

त्यसैगरी पठाओ लगायतका राइड सेयरिङका लागि समेत यस्ता सवारी साधन प्रयोग गर्न सकिन्छ । यसबाट ९९ प्रतिशत भन्दा बढी रकम राइडरहरुले नाफा गर्न सक्ने छन् ।