विभागले भन्यो: असोज १ गतेदेखि इम्बोस्ड नम्बर प्लेट अनिवार्य

काठमाडौं - यातायात व्यवस्था विभागले आगामी असोज १ गतेदेखि सवारी दर्ता, नामसारी र नवीकरण गर्दा अनिवार्यरुपमा इम्बोस्ड नम्बर प्लेट जडान गर्नुपर्ने जनाएको छ ।

२०७९ साल असोज २० गते मन्त्रीस्तरीय समितिको निर्णयअनुसार सबै प्रदेश सरकार मातहतका यातायात व्यवस्था कार्यालयहरूले यो व्यवस्था लागू गर्ने भएका हुन् ।

मंगलबार एक सूचना जारी गर्दै विभागले सबै सवारीधनीहरूलाई सम्बन्धित यातायात कार्यालयमा गएर इम्बोस्ड नम्बर प्लेट अनिवार्यरुपमा जडान गर्न आग्रह गरेको छ ।

सूचनामा भनिएको छ, ‘सबै सवारीधनीहरूले यथाशीघ्र सम्बन्धित यातायात कार्यालयमा गई हाइ सेक्युरिटी इम्बोस्ड नम्बरप्लेट जडान गर्नुपर्नेछ ।’