साझाका विद्युतीय बस अपांगमैत्री हुने, सिंगल चार्जमा २ सय किमी चल्ने

काठमाडौं – साझाले नेपालमा परीक्षणका लागि भित्र्याइरहेको विद्युतीय बस अपांगमैत्री हुने भएको छ । साझाले अपांगहरुका लागि सहज तरिकाले बसमा आवतजावत गर्नका लागि विशेष व्यवस्था गर्ने भएको छ ।

साझाले ३ वटा बस परीक्षणका लागि नेपालमा उपलब्ध गराउने भएको हो । यी बस हाल भन्सारमा भित्रिसकेका छन् । केही दिन भित्रै यी बस काठमाडौंमा आइपुग्ने छन् ।

साझा यातायात सहकारी संस्थाका सञ्चालक समिति सदस्य भूषण तुलाधरका अनुसार यी बस सिंगल चार्जमा २ सय किलोमिटर गुड्ने अनुमान गरिएको छ । काठमाडौं उपत्यकाका विभिन्न रुटमा परीक्षण गरिए पश्चात अन्य बस भित्र्याउने वारेमा छलफल हुनेछ ।

संस्थाले गत असोज २२ गते चीनको सिएचटिसी किनविङ (नानजिन) अटोमोबाइल कम्पनी लिमिटेडसँग ४० बस खरिदका लागि सम्झौता गरेको थियो । सो सम्झौतामा कम्पनीसँग बस र त्यसलाई आवश्यक चार्जर खरिद गर्ने र पाँच वर्षसम्म मर्मत गर्ने उल्लेख छ ।

सम्झौताअनुसार संस्थाले ४० वटा विद्युतीय बस र २० वटा चार्जरका लागि ३७ लाख ३८ हजार ५५० अमेरिकी डलर तथा आवश्यक तालिम र पाँच वर्षको मर्मतसम्भार र स्पेयर पार्टका लागि नेपाली ६ करोड ७३ लाख ६५ हजार ५५३ प्रदान गर्नेछ ।

संस्थाले गत चैतमा आह्वान गरेको अन्तर्राष्ट्रिय बोलपत्रअनुसार नौ कम्पनीले बुझाएको बोलपत्रको मूल्याङ्कन गरेर सबै प्राविधिक ‘स्पेसिफिकेसन’ हरु मिलेको र कम मूल्य कबोल गरेको सो कम्पनीको प्रस्ताव स्वीकृत भएको थियो । २६ सिट क्षमताका बस अपाङ्गतामैत्री रहने छन् । यी बस एकपटक चार्ज गरेपछि ४२ भन्दाबढी यात्रु लिइ २०० किमी गुड्न सक्नेछन् ।