कारको क्याबिनमा हानिकारक रसायन फेला, मानव शरीरमा क्यान्सर हुने सम्भावना

अमेरिकामा गरिएको हालैको एक अध्ययनले कार भित्रको हावाको गुणस्तरको बारेमा चिन्ताजनक निष्कर्ष सार्वजनिक गरेको छ । सो अध्ययनका अनुसार ड्राइभर र यात्रुहरू सम्भावित क्यान्सर निम्त्याउन सक्ने रसायनको सम्पर्कमा आउने गरेको पाइएको छ ।

अमेरिकाका ३० राज्यमा गरिएको उक्त अध्ययनले २०१५ देखि २०२२ सम्मका १०१ इलेक्ट्रिक, ग्यास र हाइब्रिड सवारीसाधनको क्याबिन एयर परीक्षण गरेको थियो । उक्त परीक्षणमा कारको क्याबिनको हावाको गुणस्तरको बारेमा विश्लेषण गरिएको थियो ।

सो अध्ययनले ९९ प्रतिशत कारमा टीसीआईपीपी नामक ज्वाला प्रतिरोधी तत्व रहेको पत्ता लगाएको थियो । हाल यसको बारेमा थप अनुसन्धान भइरहेको छ । धेरैजसो कारमा दुईवटा थप फ्लेम रिटार्डेन्ट टीडीसीआईपीपी र टीसीइपी पनि पाइएको छ, जसले क्यान्सर जस्ता गम्भीर रोग निम्त्याउन सक्ने प्रबल सम्भावना रहेको छ ।

अध्ययनले गर्मीमा विषाक्त फ्लेम रिटार्डेको स्तर सबैभन्दा बढी हुने देखाएको छ । अनुसन्धानकर्ताले सिट फोम क्याबिन हावामा क्यान्सर पैदा गर्ने यौगिकको स्रोत भएको बताए । कारमा बढी समय बिताउने चालकलाई यसको जोखिम बढी हुने अध्ययनले बताएको छ ।

यस्ता विषाक्त फ्लेम रिटार्डेको जोखिमलाई न्यूनीकरण गर्न पनि सकिने अध्ययनले देखाएको छ । यसको लागि पार्किङमा विशेष ध्यान दिनुपर्छ । कार ड्राइभ गरिसकेपछि केही समयका लागि कारको झ्याल खुल्ला छोड्ने वा छायादार ठाउँ वा ग्यारेजमा कार पार्किङ गर्नुपर्छ । कारको एयर फिल्टर नियमित रुपमा परिवर्तन गर्नुपर्छ । सम्भव भएसम्म छोटो दुरीका लागि कारको प्रयोग नगरौँ ।