आज धनतेरस : नयाँ गाडी र मोटरसाइकल किन्नेका लागि यसकारण छ विशेष

आज धनतेरस । धनतेरसलाई वर्षकै अत्यन्तै शुभ योगका रुपमा लिइन्छ । यस दिन धनी देखि लिएर गरिब परिवारका मानिसले आफ्नो गच्छे अनुसार घरमा प्रयोग हुने सामान किनमेल गर्ने परम्परा रहिआएको छ । सक्नेले सुन, चाँदि, इलेक्ट्रोनिक आइटम र गाडी किन्ने गर्छन भने सामान्य परिवारका मानिसले आफूले सके अनुसारको भाडा तथा कपडा किन्ने परम्परा रहेको छ ।

यस दिन आफ्नो राशिअनुसार सामान किनमेल गरि घरमा लगेर सही दिशामा राख्न सकियो भने महालक्ष्मीको आशिर्वाद मिल्ने ज्योतिषहरुले बताउने गरेका छन् । हिन्दु धर्मावलम्बीले आस्था र विस्वासका साथ सकेअनुसारको सरसामान किन्ने परम्परा रहिआएको छ ।

किनेको सामान घरमा लगेर सहि दिशामा राखियो भने वर्ष भरिनै यसको प्रयोगबाट शुभ फल प्राप्त हुने शास्त्रमा उल्लेख गरिएको छ । यसो गर्नाले शुभ समयमा घरभित्र ल्याइएको वस्तुमा लक्ष्मीको शुभ आशिर्वाद समेत रहने विश्वास छ ।

तिहारको छेको पारेर मनाइने यो पर्व विशेष महत्वको रहेको छ । व्यवसायीहरुका लागि पनि यो दिन विशेष महत्वको हुन्छ । यहि दिनलाई लक्षित गरी विभिन्न अटोमोबाइल कम्पनीहरुले नगद छुटको योजना समेत ल्याएका छन् ।

यही दिनलाई लक्षित गरेर व्यवसायीहरूले सामान मौज्दातसमेत राख्ने गरेका हुन्छन् । यो दिन पसल सजाएर आकर्षक बनाइन्छ । कतै सयपत्री फूलले त कतै झिलिमिली विद्युतीय बत्ती राखेर तिहार आएको झल्को दिलाइन्छ । दसैं तिहारको अवसरमा सार्वजनिक गरिएको स्किमका साथ ग्राहकलाई सवारी साधन उपलब्ध गराउने र सजाएर राखिएको सोरुमलाई झनै आकर्षक बनाउने गरिन्छ ।

त्यसैगरी पहिले नै बुकिङ गरेका गाडी यो दिन डेलिभरी लिने समेत गरिन्छ । नयाँ ग्राहकले यो दिन नगदमै गाडी खरिद गर्ने प्रचलन समेत बढ्दो छ । दसैंको फूलपाती, धनतेरस र तिहारको लक्ष्मी पूजाको दिन विशेष गरी सवारी साधन बढी बिक्री हुने दिन मानिन्छ ।