यस्तो छ नेपाल आउँदै गरेको बीवाईडी सिगल, ह्याचब्याक सेग्मेन्टमा मार्केट लिडर बन्ला ?

काठमाडौं–बीवाईडीको सबैभन्दा सस्तो ह्याचब्याक कार सिगल नेपाल आउने पक्का भएको छ । सो नयाँ कारलाई बीवाईडीको नेपालका लागि आधिकारिक वितरक साइमेक्स इंकले अबको केही महिनापछि बिक्री गर्न लागेको हो । परिक्षणका लागि एक यूनिट सिगल भन्सार नाकामा आईसकेको र छिट्टै बिक्री प्रारम्भ हुने कम्पनी स्रोतले जनाएको छ ।

बीवाइडीले आफ्नो विद्युतिय ह्याचब्याक कार सिगललाई चीनमा हालै अपडेट गरेर ल्याएको थियो । सोही अपडेटेट भर्सन नेपालमा समेत बिक्री हुन लागेको हो ।

बीवाइडीको ई–प्लेटफर्म ३.० मा बनेको सिगलमा इलेक्ट्रिक एड्जस्टेवल ड्राइभर सिट दिइएको छ । चीनमा ३ वटा भेरिएन्टमा उपलब्ध नयाँ सिगलमा ३०.०८ र ३८.८८ किलोवाट आवरको ब्याट्री प्याक जाडन गरिएको छ । जसलाई एकपटक फुल चार्ज गर्दा ३०५ र ४०५ किलोमिटरसम्म रेन्ज पाइने दावी गरिएको छ । कारमा ५५ किलोवाट क्षमताको मोटर जडान गरिइएको छ भने यसले डिसी फास्ट चार्जर समेत सपोर्ट गर्दछ ।

सो नयाँ कारको इन्टेरियरमा १०.१ इन्चको रोटेवल इन्फोटेन्मेन्ट सिस्टम र ७ इन्चको इन्ट्रुमेन्ट क्लष्टर राखिएको छ । साथै यसमा ओटीए अपडेट, चारवटा स्पीकर, भ्वाइस इन्ट्रिगेसन, इन–कार वाईफाई, फोरजी नेटवर्क र किलेस इन्ट्री जस्ता फिचर उपलब्ध गराइएको छ ।
चीनमा यसको मूल्य ९ हजार ७०० देखि १२ हजार अमेरिकी डलरसम्म निर्धारण गरिएको छ । नेपाली बजारमा आउँदा यसको मूल्य ३० लाख हाराहारी पर्ने अनुमान गरिएको छ ।

नेपाली बजारमा निकै चासोका साथ हेरिएको सिगल सस्तो मूल्यमा आउने अपेक्षा सहित अहिले पनि धेरै ईभी पारखीले यसलाई प्रतिक्षा गर्दै आएका छन् । नेपाल आएपछि यसको सिधा प्रतिस्पर्धा डोङफेङ नामी र टाटा टियागोसंग हुनेछ । ह्याचब्याक सेग्मेन्टमा अहिले टियागो र नामी दुबै कारले राम्रो बजार पाइरहेका छन् ।

बीवाईडीले यसअघि नेपाल ल्याएको एट्टो३ र डल्फिनजस्तै सिगल पनि सफल हुने अपेक्षा गर्न सकिन्छ । कम्प्याक्ट एसयुभीमा एट्टो३ र प्रिमियम ह्याचब्याकमा डल्फिन जस्तै इन्ट्रि लेभल ह्याचब्याकमा पनि सिगल मार्केट लिडर बन्ने अनुमान गर्न सकिन्छ ।