भेस्पा अप्रिलियाको नयाँ डिलर डेल्टा अटोकर्पले ग-यो डिलर आह्वान

काठमाडौं – भेस्पा र अप्रिलियाको नयाँ आधिकारिक वितरक नियुक्त भए पश्चात डेल्टा अटोकर्पले देशका विभिन्न स्थानमा डिलर आह्वान गरेको छ ।

डेल्टा अटोकर्पले एक सूचना प्रकाशित गर्दै देशभरका विभिन्न स्थानमा डिलरको रुपमा काम गर्न इच्छुक फर्म, व्यक्ति तथा संस्थाहरुलाई यथाशीघ्र सम्पर्क राख्न आह्वान गरेको छ ।

दुगड ग्रुप अन्तर्गतको दुगड ब्रदर्स एन्ड सन्सले यी दुई प्रिमियम ब्रान्डका स्कुटरको बिक्री–वितरण गरिरहेकोमा हालै भिमसरिया ग्रुप अन्तर्गतको डेल्टा अटोकर्प नयाँ वितरक नियुक्त भएको हो ।

पहिले डी–लाइफ स्टाइल आधिकारिक वितरक रहेकोमा दुगड ग्रुपले यी दुई ब्रान्डको डिलरसिप आफू मातहत ल्याएको थियो । त्यसपछि दुगड समूहबाट समेत यो ब्रान्ड खोसिएर भिमसरिया ग्रुप मातहत आएको छ ।

मोबाइल र अन्य व्यवसायमा संलग्न भिमसरिया ग्रुप अब यी दुई ब्रान्डको आधिकारिक वितरक भएसँगै नयाँ तरिकाले बजार व्यवस्थापन गर्ने बताएको छ ।