खोप उपलब्ध गराउन मन्त्री समक्ष रिकन्डिसन अटो व्यवसायी संघको माग

काठमाडौं – नेपाल रिकन्डिसन अटो व्यवसायी संघले आफ्ना ३ सय सदस्यहरुलाई कोभिड–१९ विरुद्ध भ्याक्सिन उपलब्ध गराउनका लागि स्वास्थ्य तथा जनसंख्या मन्त्री शेरबहादुर तामाङसमक्ष माग गरेको छ ।

संघका कार्यकारी अध्यक्ष रमेश कोइरालाको नेतृत्वमा गएको प्रतिनिधि मण्डलले हालको विषम परिस्थितिमा अग्रभागमा रही काम गर्नु पर्ने अवस्थामा रहेका रिकन्डिसन व्यवसायीहरुलाई खोप उपलब्ध गराउन आग्रह गरेको हो । सो अवसरमा मन्त्री तामाङले आगामी दिनमा रिकन्डिसन व्यवसायीहरुलाई पनि खोपका लागि प्राथमिकतामा राखिने आश्वासन दिएको अध्यक्ष कोइरालाले बताए ।

प्रतिनिधि मण्डलमा अध्यक्ष कोइरालाका साथै कोषाध्यक्ष राजकुमार देवकोटा र साधारण सदस्यहरु कुमार चिमोरिया, माधव रिजाल र प्रविण लामिछाने संलग्न थिए ।

काठमाडौं उपत्यकामा रिकन्डिसन अर्थात सेकेन्ड ह्यान्ड गाडी बिक्रेताहरुको साझा संगठनको रुपमा नेपाल रिकन्डिसन अटो व्यवसायी संघ क्रियाशील छ ।