२५० सीसी क्षमताको सबैभन्दा कम मूल्यको अफरोड बाइक क्रसफायर ट्रयाकर सार्वजनिक

अफरोड अर्थात डर्ट सेग्मेन्टमा चर्चित क्रसफायरले २५० सीसी क्षमतामा सबैभन्दा कम मूल्यको बाइक सार्वजनिक गरेको छ । क्रसफायर मोटरसाइकलको नेपालका लागि आधिकारिक बितरक क्लासिक ह्विल्स एक्स्पोर्ट एन्ड इम्पोर्ट प्रालिले नेपाली बजारका लागि हिजो ट्रयाकर २५० सार्वजनिक गरेको हो ।

यो बाइकको मूल्य ३ लाख ४८ हजार रुपैयाँ निर्धारण गरिएको छ । जुन बजारमा हाल उपलब्ध यही सेग्मेन्टको अन्य बाइकको तुलनामा सबैभन्दा कम मूल्यको हो । औपचारिक रुपमा सार्वजनिक गरिएसँगै यसको प्रि–बुकिङ समेत खुल्ला गरिएको छ भने ग्राहकको माग बमोजिम छिटोभन्दा छिटो डेलिभरी दिने प्रबन्ध मिलाइएको कम्पनी स्रोतले बताएको छ ।

टे«कर २५० मा सिंगल सिलिन्डर, फोर स्ट्रोक र टु भल्भ एयरकुल्ड इन्जिन जडान गरिएको छ । जसको अधिकतम पावर २० बीएचपी र टर्क १८.५ एनएम रहेको छ । प्रतिलिटर इन्धन खपतमा ३० किलोमिटर माइलेज प्रदान गर्ने दाबी गरिएको यो बाइकको लुक्स तथा डिजाइन समेत निकै नै आकर्षक देखिन्छ ।

अगाडि टेलिस्कोपिक र पछाडि मोनोशक सस्पेन्सन जडान गरिएको यो बाइकको ग्राउन्ड क्लियरेन्स २४० एमएम रहेको छ । अगाडि र पछाडि दुबै चक्कामा डिस्क ब्रेक दिइएको यो बाइकको कुल तौल ११५ किलोग्राम छ ।

यो बाइकको हेड र टेल लाइटमा हेलोजन बल्व जडान गरिएको छ भने इन्डिकेटरमा एलईडी लाइट दिइएको छ । सस्तो मूल्यमा आकर्षक र पावरफुल बाइक उपलब्ध गराएका कारण यसले नेपाली बजारमा छिट्टै प्रभाव जमाउने कम्पनी स्रोतको दाबी छ ।

यो बाइकले मोटरहेडको स्पोर्ट्स अफरोड २५० सँग प्रतिस्पर्धा गर्ने देखिन्छ ।