पूर्व राजपरिवारले शिकारमा प्रयोग गरेको ५५ वर्ष पुरानो सीजे–५ नेपालको जिप सोरुममा

के तपाईं जिपको फ्यान हुनुहुन्छ ? या जिपको इतिहासमा चाख राख्नुहुन्छ ? यदि हो भने जिपको नक्सालस्थित सोरुममा डिस्प्लेमा राखिएको क्लासिक जिप तपाईंका लागि रोचक हुनसक्छ । हो, नेपालका लागि जिपको आधिकारिक विक्रेता एमएडब्लु लाइफले जिपको इतिहासमै सबैभन्दा लामो समयसम्म उत्पादन गरिएको मोडल जिप सीजे–५ लाई डिस्प्लेमा राखेको छ ।

के हो सीजे ५?
सन् १९३९ मा पूरै विश्व दोस्रो विश्वयुद्धमा होमिए पनि अमेरिका भने युद्धमा जान तयार थिएन । जल र हवाई सेनामा बलियो अमेरिका स्थल युद्धका लागि घोडा र मोटरसाइकलमा निर्भर थियो । त्यसैले उसले युद्धका लागि भनेर आफैंले स्पेसिफकेसन बनाएर जिपको निर्माण गर्न लगायो, विलिस कम्पनी मार्फत् ।

सन् १९४५ मा दोस्रो विश्वयुद्धको समाप्ती पछि विलिसले सेनाका लागि मात्र होइन, सर्वसाधारणका लागि पनि जिपको उत्पादन थाल्यो जसलाई सीजे अर्थात ‘सिभिलियन जिप’ भन्न थालियो । र जिपको स्वामित्व विलिसबाट हेनरी केसरमा सरेपछि सन् १९५५ बाट सीजे ५ को उत्पादन हुन थाल्यो । ठूलो दुई वटा हेडलाइट र गोलो फ्रन्ट फेन्डर तथा चेप्टो सेभेन स्लट ग्रिलका कारण यसको डिजाइन आकर्षक बनेको थियो ।

सीजे ५ कोरियन वार एम३८ए१ जिपबाट प्रभावित थियो । यसमा गोलो फेन्डर, फलामबाट बनेको हुड र बढी, ठूलो विन्डशिल्ड फ्रेम, एड्जस्टेबल बकेट सिट, ब्याक लिट इन्स्ट्रयुमेन्ट प्यानल र चार जनाको सिटिङ क्षमता जस्ता अपग्रेड गरिएका छन् ।

सन् १९६५ मा सीजे ५ मा विलिसको हुरिकेन इन्जिन थियो जसले १५५ एचपी पावर उत्पन्न गर्छ । सन् १९५५ बाट सुरु भएको सीजे ५ को उत्पादन तीन दशक कायम रह्यो । यसमा ३.७ लिटरको भी६ इन्जिन थियो जसले १५५ एचपी पावर उत्पन्न गथ्र्यो । सीजे ५ मा सानो इन्जिन पनि रहन्थ्यो जसले ७५ एचपी पावर उत्पादन गथ्र्यो ।

सन् १९७२ मा सीजे ५ मा व्यापक परिवर्तन गरियो जस्तो कि यसमा ५.० लिटरको भी८ इन्जिन राखियो । ठूलो इन्जिनलाई अटाउन यसको ह्विलबेस ७६ एमएम थपियो र सीजे ५ अझै ठूलो देखियो । सन् १९७३ बाट भने सीजे ५ मा रेडियो पनि जडान गरियो र १९७५ मा एयर कन्डिसन पनि हालियो । समयको क्रमसँगै नयाँ प्रविधिलाई अँगाल्दै आएको सीजे ५ को उत्पादन अन्ततः सन् १९८३ मा बन्द भयो, सीजे ७ लाई ठाउँ दिनका लागि । यहीँ सीजे ५ बाट प्रभावित पहिलो रेंग्लर (वाईजे)को उत्पादन सन् १९८७ बाट सुरु भएको हो ।

कस्तो छ जिप सोरुममा राखिएको सीजे ५?
जिप सोरुममा राखिएको सीजे ५ को उत्पादन मिति सन् १९६८ हो जुन अमेरिकामा बनेर आएको थियो । बतास समूहले संचालनमा ल्याएको क्लासिक कारको कलेक्सनबाट ल्याइएको यो जिप कसको हो भन्ने स्पष्ट छैन । तथापि यो पूर्व राजपरिवारले शिकारमा प्रयोग गर्न ल्याइएको भन्ने बताइन्छ । यो विशेष सीजे ६ टक्सेडो पार्क मार्क सिरिजको हो । हुड निकाल्न मिल्ने यो जिप ओपन एयर एड्भेन्चरका लागि उपयुक्त मानिन्थ्यो । सेभने स्लट ग्रिलको छेऊमा राखिएको दुई वटा ठूला हेडलाइटले गाडीलाई एग्रेसिभ देखाउँछ । यसको बायाँतिर सीजे ५ को सिग्नेचर मानिने एडिस्नल ह्विल राखिएको छ । भी६ इन्जिन रहेको यो जिप लेफ्ट हेन्ड ड्राइभ हो जसमा जिपको लिजेन्डरी ४ बाई ४ ट्रान्समिसन इन्जिन लगाइएको छ ।

यो मोडल निकै चर्चित थियो जुन खेतीपाती, शिकार वा उद्योगमा पनि प्रयोग हुन्थ्यो । तीस वर्षमा जिपले ६ लाख युनिट सीजे ५ उत्पादन गरेको थियो ।

यदि तपाईंलाई यो ऐतिहासिक जिप हेर्ने मन छ भने तपाईं जिप सोरुममा गएर यसलाई हेर्न, छुन र फोटो समेत खिचाउन सक्नुहुन्छ । र यसको छेऊमा जिपको ८० वर्ष लामो इतिहासमा उत्पादन गरिएको मोडलहरुबारे जानकारी पनि पाउन सक्नुहुनेछ ।