नेपाली बजारमा फ्रेन्च ब्रान्डको अर्को इलेक्ट्रिक कार आउन सक्ने संभावना, भारतमा अर्को वर्ष लन्च हुने

फ्रेन्च अटो निर्माता सिट्रोनले भारतमा इलेक्ट्रिक कार उत्पादन गर्ने भएको छ । २ महिनापछि लन्च गर्ने तयारी भैरहेको कम्वस्चन इन्जिनयुक्त सि३ मोडलमा आधारित यो नयाँ इलेक्ट्रिक कारलाई उसले अर्को वर्षको अन्त्यसम्ममा लन्च गरिसक्ने जनाएको छ ।

भारतमा अहिले यो ब्रान्डको सि५ एयरक्रस प्रिमियम एसयुभी बिक्री हूँदै आइरहेको छ । नयाँ इलेक्ट्रिक कार लन्च गर्ने पक्कापक्कि गरेसंगै कम्पनीले अहिले भारतमा विभिन्न स्थानहरुमा डिलर नेटवर्क बिस्तार गर्ने योजना अघि सारेको छ ।

सि३ मोडलकै प्लेटफर्ममा निर्माण गर्न लागिएको यो सव फोर मिटर इलेक्ट्रि कार मूल्यका हिसावले सुलभ रहने अनुमालन लगाइएको छ । भारतीय बजारलाई लक्षित गरी निर्माण गर्न लागिएको यो कार मार्फत सिट्रोनले बजारमा बलियो उपस्थिती जनाउने अपेक्षा लिएको छ ।

यो नयाँ इलेक्ट्रिक कारमा कुन साइजको व्याट्री प्याक जडान हुने र यसले कति रेन्ज दिन सक्छ भन्ने बारे कम्पनीले कुनै जानकारी बाहिर ल्याएको छैन । यो कार निर्माण गर्दा ९० प्रतिशतभन्दा बढी सामाग्री भारतकै प्रयोग हुने जनाइएको छ ।

सिट्रोन नेपाली बजारमा समेत उपलब्ध रहँदै आएको छ । बजारमा अहिले यसको सि५ एयरक्रस एसयुभी बिक्री हुँदै आइरहेको छ । भारतमा नयाँ इलेक्ट्रिक कारको उत्पादन पश्चात यो नयाँ मोडल नेपाली बजारमा समेत भित्रिने सहजै अनुमान लगाउन सकिन्छ । नेपाली बजारमा सांग्रिला मोटर्सले यो ब्रान्डको आधिकारिक वितरकका रुपमा कारोबार गर्दै आइरहेको छ ।