सिट्रोनको इलेक्ट्रिक कार ई–सी३ को खुल्यो बुकिङ, मूल्य ३३ लाख देखि शुरु

काठमाडौं – सिट्रोनको नेपालका लागि आधिकारिक वितरक सांग्रिला मोटर्सले नयाँ इलेक्ट्रिक कार ई–सी३ को बुकिङ खुला गरेको छ । विश्व वातावरण दिवसको अवसरमा बुकिङ खुला गरिएको बताइएको सो इलेक्ट्रिक कारको मूल्य ३२ लाख ९९ हजार रुपैयाँबाट शुरु हुने बताइएको छ ।

इलेक्ट्रिक कार ई–सी३ हालै भारतीय बजारमा लन्च भइसकेको छ । नेपालमा यसको व्यग्र प्रतीक्षा भइरहेको समयमा बुकिङ खुला गरिएको हो ।

गत फागुनमा मात्र भारतमा लन्च गरिएको सो इलेक्ट्रिक कारको मूल्य भारतमा ११ लाख ५० हजार भारु देखि सुरु हुन्छ ।

४२ किलोवाटको मोटर रहेको यो इलेक्ट्रिक कार लाइभ, फिल, फिल भाइब प्याक, फिल ड्युअल–टोन भाइब गरी ४ भेरिएन्टमा उपलब्ध छ ।

सिट्रोन ई-सी३ मा २९.२ केडब्ल्युएचको ब्याट्री प्याक दिइएको छ । जसले ५७ बीएचको पावर र १४३ एनएमको टर्क जेनेरेट गर्छ । सिट्रोनलको सो ईभीले ८ सेकेन्डमा ०–६० किलोमिटर प्रतिघण्टाको गति लिन सक्ने दाबी गरिएको छ ।

सो ईभीको ब्याट्रीलाई फुल चार्ज गर्न १० घण्टाको समय लाग्छ भने डीसी फास्ट चार्जरबाट १० देखि ८० प्रतिशतसम्म चार्ज हुन ५९ मिनेटको समय लाग्छ । एक पटक फुल चार्ज भइसकेपछि सो कारले ३२० किमीको रेन्ज प्रदान गर्छ ।

कम्पनीले यसमा अटोमेटिक ड्राइभको लागि ई–टगल स्विच दिएको छ । सामान राख्नको लागि ३१५ लिटरको बुट स्पेस दिइएको छ । यसमा ३५ स्मार्ट फिचर, २६ सेमी टचस्क्रिनसहितको वायरलेस स्क्रिन मिररिङ, स्टेयरिङ ह्विलमा अडियो र फोन कन्ट्रोल, ब्लुटुथ कनेक्टिभिटी, १८० एमएम ग्राउन्ड क्लियरेन्स, एलईडी डीआरएल फिचर दिइएको छ ।