सिटिजन बैंकका सीईओले प्रयोग गर्ने भए १५० किलोवाटको बीवाईडी एट्टो ३

काठमाडौं – सिटिजन बैंक इन्टरनेसनलका सीईओ गणेशराज पोखरेलले १५० किलोवाट क्षमताको बीवाईडी एट्टो ३ गाडी चढ्ने भएका छन् । बैंकले केही समय पहिले निकालेको फोर ह्विल इलेक्ट्रिक गाडीको टेन्डर अनुसार बीवाईडीको नेपालका लागि आधिकारिक वितरक साइमेक्स इंकले सो इलेक्ट्रिक कार उपलब्ध गराएको हो ।

हाल बैंकको सामान्य सेवा विभागका कर्मचारीलाई सो गाडी हस्तान्तरण गरिएको र आगामी दिनमा सीईओले यसको प्रयोग गर्ने बताइएको छ ।

सो कारको मूल्य ८९ लाख ९० हजार रुपैयाँ छ । यसमा ६०.४ किलोवाट क्षमताको ठूलो ब्लेड व्याट्री जडान गरिएको छ । यसले २०० एचपी पावर र ३१० एनएम टर्क जेनेरेट गर्ने क्षमता राख्छ । ८० किलोवाटको फास्ट चार्जरले करिव ४५ मिनेटमै फुल चार्ज गर्न सकिने यस कारले ४२० किलोमिटर सम्मको रेन्ज दिने दाबी गरिएको छ ।

यो भन्दा पहिले चर्चित कलाकार हरिबंश आचार्यले समेत यही कार खरिद गरेका थिए । साइमेक्स इंकले हाल १०० किलोवाट क्षमताको एट्टो ३ समेत भित्र्याएको छ ।