साझा यातायातलाई ४० वटा विद्युतीय बस उपलब्ध गराउने भयो चीनको सीएचटीसीले, भयो सम्झौता

काठमाडौं – साझा यातायातले चीनको सीएचटीसी किन्विन (नान्जिङ) अटोमोबाइल कम्पनी लिमिटेडबाट ४० वटा विद्युतीय बस र यसलाई आवश्यक पर्ने चार्जर खरिद गरी ५ वर्ष सम्म मर्मत सम्भार गर्ने सम्झौता गरेको छ ।

यस सम्बन्धी सम्झौता पत्रमा साझा यातायातको तर्फबाट सञ्चालक समिति सदस्य बन्दना थापा र सीएचटीसीको तर्फबाट सीएचटीसीको नेपाल प्रतिनिधिको रुपमा एनईभी नेपाल प्रालि (दीगो ग्रुप) का प्रबन्ध निर्देशक राजन रायमाझीले हस्ताक्षर गरे । दीगो ग्रुपले हाल नेपाली बजारमा दीगो ब्रान्डमा विभिन्न विद्युतीय सवारी साधन बिक्री–वितरण गरिरहेको छ ।

सम्झौता अनुसार साझा यातायातले ४० वटा विद्युतीय बस र २० वटा चार्जरको लागि अमेरिकी डलर ३७ लाख ३८ हजार ५५० तथा आवश्यक तालिम र ५ वर्षको मर्मत सम्भारका लागि ६ करोड ७३ लाख ६५ हजार ५५३ रुपैयाँ प्रदान गर्नेछ ।

साझा यातायातले गत २०७७ चैत १३ मा आह्वान गरेको अन्तर्राष्ट्रिय बोलपत्र अनुसार ९ वटा कम्पनीहरुले बुझाएको बोलपत्रको मूल्यांकन गरी सबै प्राविधिक स्पेसिफिकेसन मिलेको र सबैभन्दा कम मूल्य कबुल गरेको सीएचटीसीको प्रस्ताव स्वीकृत गरेको बताएको छ । सो कम्पनीले शुरुमा ३ वटा बसहरु ४ महिना भित्र ल्याउने र काठमाडौं उपत्यकामा परीक्षण गरिए पश्चात बाँकी बस भित्र्याउने बताइएको छ ।

२६ सिट क्षमताका यी अपांगमैत्री बसले एक पटक चार्ज गर्दा ४२ भन्दा बढी यात्रु लिई २ सय किलोमिटर गुड्न सक्ने छन् ।

साझा यातायातले यी भन्दा ठूला विद्युतीय गाडीहरु गुडाउनका लागि समेत आवश्यक अनुसन्धान शुरु गरेको बताएको छ । त्यसैगरी ललितपुर महानगरपालिकासँगको सहकार्यमा थप ४ वटा विद्युतीय बस खरिद गर्ने प्रक्रिया समेत अगाडि बढाएको छ । नेपाल सरकार र विद्युत प्राधिकरणसँगको सहकार्यमा चार्जिङ स्टेसन स्थापना गर्ने र पुराना डिजेल गाडीहरुलाई विद्युतीयमा रुपान्तरण गर्न आवश्यक अनुसन्धान गर्ने कार्य पनि अगाडि बढाइरहेको छ ।