सेमिकन्डक्टर अभाव १ वर्षपछि समाधान हुने, नयाँ प्रविधिमा काम गर्दै ठूला उत्पादक

विगत २ वर्षयता चरम रुपमा अभाव हुँदै आएको सेमिकन्डक्टरको सप्लाई अव सहज हुने भएको छ । सवारीसाधनमा प्रयोग हुने चीपमा आधारित यो सामग्रीको सवैभन्दा ठूलो निर्माता भिस्टोनका सिइओ सचिन लवान्डेका अनुसार अवको १ वर्षपछि अर्थान सन् २०२३ देखी यो समस्याको दिर्घकालिन समाधान हुने भएको हो । चीप अभावका कारण विश्वभर नै सवारीसाधनको उत्पादन प्रभावित बन्दै आइरहेको छ ।

सवारीसाधनका लागी अत्यवश्यक यो डिभाइसको उत्पादन नयाँ तवरबाट हुन लागिरहेको कारण ठूलो मात्रामा सप्लाई गर्न समस्या नहुने उनको जिकिर छ । उनले भनेका छन, ‘केही क्लासका लागि अहिले पनि पर्याप्त मात्रामा सप्लाई हुँदै आइरहेको छ । सानो भन्दा सानो नानोमिटर प्रविधीमा आधारीत भई उत्पादन हुन थालेपछि २८, १४, १० र ७ नानोमिटरका चिपको सप्लाइमा समस्या हुनेछैन । जसका लागी यस्ता डिभाइस उत्पादन गर्ने कम्पनीले ठूलो रकम लगानी गरिरहेका छन् ।’

लवान्डेका अनुसार हाल बजारमा ठूलोमा ४० नोनोमिटर र सवैभन्दा सानोमा ७ नानोमिटर सम्मका चीपको सप्लाई हुँदै आइरहेको छ । ठूलो आकारको चिप विस्तारै विस्थापित हुँदै जाने र यसको स्थानमा साना आकारले स्थान लिने उनको भनाई छ । यो नयाँ प्रविधीको चीप छिटो र अत्याधुनिक रहेको कारण थोरै संख्यामा प्रयोग गर्न सकिनेछ । कम्पनीले पछिल्लो समय महिन्द्रा एक्सयुभी ७०० मा नयाँ प्रविधीको स्मार्ट कोर सिस्टमयुक्त चिप सप्लाई समेत थालिसकेको छ ।

२ वर्षअघि निम्तिएको विश्वव्यापी कारोना महामारीको समयमा प्राय सवैजसो अटो उत्पादकहरुले गाडी बिक्री घट्ने अनुमान लगाउँदै चीपको माग कम गरेका थिए । जसका कारण ठूला उत्पादकहरुले यो सिमिकन्डक्टरको उत्पादन कटौती गरे । तर उनीहरुले लगाएको अनुमानको ठिक विपरित गाडीको माग र बिक्री दुबै वढ्न थालेपछि सवारीसाधनको उत्पादनमा दवाव बढ्न गई चीपको आभाव चर्किएको हो । जुन अहिलेपनि अभावग्रस्तकै अवस्थामा रहिरहेको छ ।