सस्तोमा ईभी बिक्री गर्दा चीनका अधिकांश ब्रान्ड संकटमा, यी ३ बाहेक बाँकी सबै ब्रान्ड घाटामा

ईभी रेसम निकै अगाडी देखिएको चीनले द्रुत गतिमा अत्याधुनिक प्रविधि र उन्नत ब्याट्री प्रणाली भएका सवारीसाधन ल्याइरहेको छ । विश्वको सबैभन्दा ठूलो ईभी बजार बन्न सफल चीनमा दर्जनौ कम्पनीले बिभिन्न ब्रान्डमा सवारीसाधन उत्पादन गरिरहेका छन् । यीमध्ये धेरैजसो ईभी ब्रान्डहरूले नाफा कमाउनुको सट्टा घाटाको सामना गरिरहेको रिपोर्टहरु बाहिर आएको छ ।

चीनमा उपलब्ध ५० भन्दा बढि ईभी ब्रान्डमा केवल तीनवटा ब्रान्डले मात्र नाफा कमाउन सफल भएको एक मिडिया रिपोर्टमा उल्लेख गरिएको छ । यी तीन ब्रान्डमा बीवाईडी, एलआई अटो र सेरेस समावेश छन् । अधिकांश ब्रान्डको घट्दो नाफाका बावजुद कतिपय कम्पनीले वित्तिय सुरक्षाको बारेमा चिन्ता नगरी उत्पादन बढाउने र उदार छुटहरु प्रदान गरिरहेका छन् ।

साउथ चाइना मर्निङ पोस्टमा प्रकाशित जेपी मोर्गनको अध्ययन अनुसार, गत अप्रिलमा ईभी उद्योगहरुले औषत छुट १६.८५ प्रतिशत दिएका छन् । जुन अघिल्लो महिना प्रदान गरिएको १६.३५ प्रतिशतको तुलनमा केही बढी हो । चाइना प्यासेन्जर कार एसोसिएसनले २०२४ को लागि औसत छुट ८.३५ प्रतिशतमा राखेको भएपनि डिसेम्बरसम्म आइपुग्दा यो बढेर १० प्रतिशत पुगेको थियो ।

विश्लेषकहरुका अनुसार, गत वर्ष ईभीको बिक्री मूल्य र अटोमेकरको लागत बीचको भिन्नता १० प्रतिशतमा झरेको थियो । जुन चार वर्ष अघि लगभग २० प्रतिशत भन्दा बढि थियो । यसरी मार्जिन घट्दै जाँदा चीनका धेरैजसो साना ईभी निर्माताहरू बजारबाट बाहिर हुने अर्थात अवको केही समयपछि ठूला प्रतिस्पर्धीहरूले अधिग्रहण गर्ने उनीहरुको ठम्याई छ ।

घरेलु बजारमा छुट दिएपनि चीनका अधिकांश ईभी उत्पादकले निर्यातमा भने राम्रै मार्जिन राख्ने गरेको जेपी मोर्गानको रिपोर्टमा उल्लेख गरिएको छ । उसका अनुसार, अन्तर्राष्ट्रिय बिक्री बढी नाफामुखी भएका कारण धेरै साना उत्पादकहरु हालसम्म जसोतसो टिकिरहेका छन् ।

सन् २०२५ को पहिलो चार महिनामा ईभीले चीनको कुल सवारी साधन निर्यातको लगभग ३३ प्रतिशत ओगटेको थियो, जुन विगत दुई वर्षमा लगभग २५ प्रतिशत थियो ।